Եվրոպայի խորհրդի Խորհրդարանական վեհաժողովի խոսնակ Աննա Բրասերն Ուկրաինայի արևելքում հակամարտության երկու կողմերին է դիմել՝ կոչ անելով անմիջապես միջոցներ ձեռնարկել լարվածության վերացման և իրավիճակի կայունացման ուղղությամբ՝ հայտնում է ITAR-TASS-ը:
«Ես չափազանց անհանգստացած եմ Ուկրաինայում, այդ թվում՝ Սլավյանսկ քաղաքում բռնության վերսկսման մասին տեղեկությամբ: Ես բոլոր կողմերին կոչ եմ անում անմիջապես մեղմել լարված իրավիճակը, դադարեցնել ցանկացած պրովոկացիոն կամ բռնի գործողություն և վերադառնալ ժնևյան պայմանավորվածություններին հետևելուն, մասնավորապես՝ զինաթափել Ուկրաինայում գործող բոլոր ապօրինի խմբավորումներին»,- ասել է նա:
Ավելի վաղ Բրասերը վստահություն էր հայտնել, որ ժնևյան համաձայնություններն Ուկրաինայի արևելքում «ժամանակավոր հանդարտություն հստատելու հույս են տվել»:
Եկող շաբաթ Կիև կմեկնի ԵԽԽՎ մոնիտորինգային նախընտրական առաքելությունը: Պատվիրակության անդամները ծրագրում են հանդիպել երկրի՝ Գերագույն ռադայի նշանակած ղեկավարության և մայիսի 25-ին նշանակված նախագահական ընտրությունների հիմնական թեկնածուների հետ:
