«Անցնող տարում իշխանություններից եղած սպասումները չարդարացան, բայց դա նորմալ է: Ես շատ կզարմանայի, եթե այդ սպասումները արդարանային, որովհետև մեր բոլորի սպասումները, ցանկությունները շատ ավելի մեծ են, քան օբյեկտիվ հնարավորությունները»,-«Առաջին լրատվական»-ի հետ զրույցում ամփոփելով անցնող տարին ասաց ՀԱԿ անդամ, նախկին քաղբանտարկյալ Գրիգոր Ոսկերչյանը: Նրա խոսքով տարբեր իրավիճակներում, տարբեր ոլորտներում իշխանություները դրսևորել են մեկ դրական, մեկ բացասական վարքագիծ, զգացողություններն էլ, հետևաբար այդպիսին են՝ դրական և բացասական 2019-ի քաղաքական իրադարձություններից, քաղաքական իրադրությունից:
Լրջագույն բարեփոխում պահանջող ոլորտներից, Ոսկերչյանը համարում է դատաիրավականը, որի ուղղությամբ աշխատանքներ կարծես տարվեցին, կամ փորձեցին տանել իշխանությունները, բայց դեռ շոշափելի ոչինչ չկա.«Դատաիրավականի հետ կապված բարեփոխումները ես համարում եմ ուշացած: Ես կցանկանայի, որ նոր տարում այդ ուղղությամբ աշխատանքները գոնե կոնցեպտուալ առումով նախանշվեին: Հեռահար ինչ-որ բաներ ասելը իրատեսական չէ, դա շոշափելի չէ: Ցանկալի կլիներ մոտակա 5 տարվա կտրվածքով, 5 տարվա վերաբերյալ ներկայացվեր ռազմավարություն, գործողությունների պլան և դատաիրավական ոլորտի հետ կապված, և տնտեսության և այլ ոլորտների: Մեզ հարկավոր է Հայաստանի զարգացման կոնցեպտուալ մոտեցումները մոտակա 5-10 տարվա վերաբերյալ: Դրա կարիքը կա: Մենք պետք է տեսնենք, թե ինչ է նախատեսված, ինչպես է դա իրականանալու և ինչ է տալու»,-ընդգծեց մեր զրուցակիցը:
Ոսկերչյանը ցանկանում է, որ 2020 թվականին վերջապես մարտի 1-ի գործով դատավարությունը սկսվի և բնականոն հունով ընթանա.«Մեր դատախազությունը, իրավապահ մարմինները պետք է վերջապես կարողանան հաղթահարել Քոչարյանի պաշտպանության տակտիկայի հետ կապված դժվարությունները և վերջապես անցնեն գործի: Մեզ շատ անհրաժեշտ է, որ մարտի 1-ի գործը շատ չերկարի: Մեզ անհրաժեշտ է, որ կատարվածի և իրավական, և քաղաքական գնահատականը տրվի ու վերջապես վերջակետ դնենք այդ էջին, փակենք, որպեսզի կարողանանք շատ ավելի լրջորեն լծվենք ապագայի զարգացման պլաններին և դրանց քննարկմանը, այլ ոչ թե անընդհատ վերլուծենք ու քննարկենք Քոչարյան, Սերժ Սարգսյան թեմաները: Մեզ՝ քաղաքացիներիս և երկրին առհասարակ խիստ անհրաժեշտ է, որպեսզի այդ թեմաներին վերջակետ դրվի՝ իհարկե իրավաքաղաքական գնահատականից հետո»,-եզրափակեց Գրիգոր Ոսկերչյանը:
