ԱԺ նախագահի կողմից իշխանության աշխատանքային խմբի կազմի հրապարակման փաստը ինչպե՞ս եք գնահատում: Ինչո՞ւ դրա մասին նախ հայտարարեց նախագահականը, հիմա՝ ԱԺ նախագահը: Արդյո՞ք ՀԱԿ-ը շարունակելու է այս աշխատանքային խմբից պահանջել Սերժ Սարգսյանի մանդատը, ասել է թե՝ ում են նրանք ներկայացնելու բանակցությունների ժամանակ:
ՀԱԿ ներկայացուցիչ Գուրգեն Եղիազարյանը, մեզ հետ զրույցում պատասխանելով այս հարցերին, նշեց, որ միանշանակ ՀԱԿ-ը պահանջելու է արտահերթ ընտրություններ: Պարզապես երկիրը փրկելու ուրիշ ճանապարհ չկա:
«Ինչ վերաբերում է նախագահականից հետո ԱԺ նախագահի մակարդակով հրավերին՝ ես դրանում արտասովոր ոչինչ չեմ տեսնում: Ճիշտն ասած՝ այստեղ առաջնայինը ոչ թե Հովիկ Աբրահամյանի կողմից հնչեցված հայտարարությունն է, այլ նյութը, թե ուր են գնալու և ինչի մասին են զրուցելու: Ինչ վերաբերում է ուղղակի ՀԱԿ-ի պահանջներին՝ դա ժողովրդի պահանջն է: Մարդիկ այսօր Հայաստանում գոյատևելու խնդիր ունեն: Դրա վառ ապացույցը ահագնացող աստիճանի հասնող արտագաղթն է: Այդ նույն փաստը նաև ապացուցվում է նրանով, որ «Ֆորբսը» վերջերս ի լուր աշխարհի հայտարարեց, որ Հայաստանը 177 երկրների սանդղակում 176-րդ տեղում է: Սրանից վատ է՞լ ինչ կարող է լինել»,- եզրափակեց Գուրգեն Եղիազարյանը:
Հիշեցնենք, որ այսօր ՀՀ ԱԺ նախագահ Հովիկ Աբրահամյանը հայտարարեց, որ պատրաստ է սկսելու քննարկումների շարքը ՀԱԿ համապատասխան հանձնախմբի հետ: «Աշխատանքային խմբի անդամները հրավիրում են Հայ ազգային կոնգրեսը ներկայացնող իրենց գործընկերներին ս.թ. հուլիսի 18-ին, ժամը 16:00-ին Հանրային խորհրդի փոքր նիստերի սրահ («Էրեբունի» հյուրանոց, 6-րդ հարկ) առաջին հանդիպման համար»,- ասվում է Հովիկ Աբրահամյանի հայտարարության մեջ:
