«Ալ-Քաիդա» միջազգային ահաբեկչական խմբավորումը նախապատրաստում էր մահափորձ իրականացնել Միացյալ Նահանգների նախագահ Բարաք Օբամայի և Աֆղանստանում ՆԱՏՕ-ի և ԱՄՆ զորքերի հրամանատար Դևիդ Պետրեուսի դեմ: Այս մասին հաղորդել է ամերիկյան վարչակազմի ներկայացուցիչը, որը ծանոթացել է Բեն Լադենին սպանելուց հետո նրա տանից առգրավված փաստաթղթերին այս տարվա մայիս ամսին:
Համաձայն նույն աղբյուրի՝ «Ալ-Քաիդան» մշակում էր մի ծրագիր, որով Օբաման և Պետրեուսը սպանվելու էին միևնույն ինքնաթիռում: Վարչակազմի ներկայացուցիչը հաղորդել է նաև, որ կան նաև փաստաթղթեր, որոնք ապացուցում են Բեն Լադենի և Արաբական թերակղզում տեղակայված մասնաճյուղի միջև կապը: Այս մասին փոխանցում է «Ամերիկայի ձայնը»:
