ԱԺ ՀՀԿ խմբակցության պատգամավոր Վարդան Այվազյանի համոզմամբ՝ հայ-թուրքական արձանագրությունները վերահաստատում են, որ Թուրքիան չի հրաժարվում իր քաղաքականությունից: «Առաջին լրատվական»-ի հետ զրույցում Այվազյանը նշեց, որ ցանկացած երևույթի վերաբերյալ եթե մենք ուզում ենք կարծիք հայտնել, այն պետք է հիմնված լինի ոչ թե գուշակությունների, այլ կոնկրետ փաստերի վրա:
«Հայաստանի Հանրապետությունը՝ հանձին նախագահ Սերժ Սարգսյանի, այդ արձանագրություններով փորձեց ապացուցել, որ Թուրքիան մնացել է նախկին Թուրքիան, այսինքն՝ ինքը ցանկացած գործառույթ իրականացնում է նորից իր նախկին ժամանակահատվածի քաղաքականությամբ, նորից ռասիզմի դրսևորմամբ, բարիդրացիական հարաբերությունների մասին միայն խոսելով, որովհետև արձանագրությունները, համենայնդեպս, տալիս էին առանց որևէ նախապայմանի բարիդրացիական հարաբերությունների կարգավորման հնարավորություն:
Փաստը, սակայն, համայն աշխարհին ցույց տվեց, որ Թուրքիան Թուրքիա է՝ իր բոլոր դրսևորումներով: Եթե Թուրքիան մի քիչ ավելի առաջադեմ լիներ, ես իշխող վերնախավի մասին եմ ասում, ուրեմն պիտի զերծ մնացած լիներ այս գործընթացներից, ընդառաջ գնար այս նախաձեռնությանը և փորձեր մտնել քննարկման փուլ, բայց տեսեք՝ բերեցին, կապեցին մի շարք հարցադրումների հետ, այդ թվում՝ Ղարաբաղյան հակամարտության և այլ խնդիրների հետ»,- ասաց նա:
Պատգամավորի խոսքով` ժամանակը ցույց տվեց, որ հանրապետության նախագահի կողմից նախաձեռնված այդ արձանագրությունները վկայում են, որ մեր հասարակարգ բաց է: Արձանագրությունները ընձեռում էին երկխոսության, հարևանների հետ բարիդրացիական հարաբերությունների, ինչու ոչ՝ նաև այդ պատմական փաստերի ճիշտ գնահատումների հնարավորություն, բայց Թուրքիան մնում է Թուրքիա:
