Մամուլում տեղեկություններ են շրջանառվում Եղվարդում նոր ընտրությունների կազմակերպման հետ կապված։ Մամուլը գրում է, որ դուք քննարկում եք արտահերթ ընտրությունների երկու ճանապարհ՝ կամ պարտադրել համայնքի գործող ղեկավարին դիմում գրել, կամ գնալ խոշորացման ճանապարհով։
Որքանո՞վ են այս լուրերը համապատասխանում իրականությանը․ «Առաջին լրատվական»-ի հարցին Կոտայքի մարզպետ Ռոմանոս Պետրոսյանը պատասխանեց․ «Ի սկզբանե ասեմ, որ Եղվարդում այս պահի դրությամբ որևէ քաղաքական պրոցես չունենք։ Կարծում եմ՝ դա որոշակի ուժի մտքի արգասիքն է՝ գուցե մեր ուշադրությունն Աբովյան քաղաքից շեղելու նպատակով։ Առհասարակ, այս պահին Եղվարդ համայնքը խոշորացված համայնք է, և այնտեղ այս տարի բավականին սուբվենցիոն ծրագրեր ենք իրականացրել։ Այս պահին Եղվարդ համայնքում 300 փոքրիկների համար նախատեսված հսկա երկհարկանի մանկապարտեզի շենքի վերակառուցում ենք անում։ Իսկ 2020 թվականին նախատեսում ենք Արագյուղի՝ թամանյանական ոճով բազալտից կառուցված մշակույթի տան հիմնանորոգում։ Այն կառուցվել է 1940-ականներին՝ պատերազմի տարիներին, և 1970-ականներին է միայն 1 անգամ վերանորոգվել։ Այսինքն՝ այս պահին Եղվարդում մենք ունենք բնականոն ստեղծագործական աշխատանքային ընթացք, և որևէ քաղաքական պրոցես նախատեսված չէ՝ նույնիսկ չենք էլ քննարկել։ Ես չգիտեմ՝ այդ լուրերը որտեղից են եկել»։
Դուք նշեցիք, որ գուցե դրանք որոշակի ուժային կենտրոնների կողմից տարածվող տեղեկություններ են, որպեսզի շեղեն ուշադրությունն Աբովյան քաղաքից։ Ի՞նչ նկատի ունեք․ «Առաջին լրատվական»-ի հարցին Ռոմանոս Պետրոսյանը պատասխանեց․ «Այ, Աբովյանում չեմ բացառում արտահերթ ընտրություն։ Աբովյան քաղաքում տեղի ունեցան հերթական ՏԻՄ ընտրությունները, որի արդյունքներն ընդունեցինք ի գիտություն, շնորհավորեցինք հաղթող կողմին, բայց ցավով պիտի նշեմ, որ հաղթող կողմի գործունեության փաստերի հիման վրա հարուցված են մի քանի քրեական գործեր։ Ուստի, ես չեմ բացառում արտահերթ ընտրություններ»։
Մանրամասները՝ տեսանյութում։
