«Առաջին անգամն է Արցախում, որ նույն օրը ընտրվելու է և՛ նախագահ, և՛ խորհրդարան: Քաղաքական ուժերը, հասկանում են, որ խորհրդարանում համապատասխան մասնակցություն ունենալու համար անհրաժեշտ է ունենալ նաև նախագահի թեկնածու: Վերջին ամիսներին քաղաքական դաշտն Արցախում ակտիվացել է, դա էլ է պարտադրում, որ ընտրություններին ավելի շատ թեկնածուներ լինեն: Բացի դրանից՝ իշխանությունը միասնական թեկնածու չունի»,- այս մասին «Առաջին լրատվական»-ի հետ զրույցում ասաց «Ազատ հայրենիք» կուսակցության նախագահ, Արցախի նախկին վարչապետ Արայիկ Հարությունյանը՝ անդրադառնալով դիտարկմանը, որ Արցախի ընտրություններին այս անգամ ակնկալվում է, որ մեծ թվով թեկնածուներ կմասնակցեն: Մեր զրուցակցի կարծիքով՝ արցախյան ընտրությունների այս փուլում դաշինքներ չեն ստեղծվի:
«Ազատ հայրենիք» կուսակցության նախագահը վստահեցրեց. «Պետք է զգույշ լինենք, կապ է պահպանվում քաղաքական կուսակցությունների ղեկավարների հետ, փորձում ենք չթույլատրել ապակայունացնող և ոչ հարիր երևույթներ»: Հարցին՝ դա պարզ կապ է, թե աջակցություն է փնտրում «Ազատ հայրենիքը», Արայիկ Հարությունյանը նշեց, որ այդպիսի անհրաժեշտություն չկա. «Ազատ հայրենքին» ունի քաղաքական համախոհ կուսակցություններ, որոնց հետ միասնաբար կմասնակցի ընտրություններին»:
Անդրադառնալով հարցին, թե արդյոք պահպանվում է Հայաստանի իշխանությունների հայտարարած դիրքորոշումը Արցախում սպասվելիք քաղաքական գործընթացներին չմիջամտելու վերաբերյալ, Արայիկ Հարությունյանը նշեց. «Աջակցությունը պետք է լինի նախընտրական փուլում և պետք է լինի քաղաքական կոշտ հայտարարությունների ձևով կամ հանձնարարականների միջոցով՝ օրինակ՝ ուժային կառույցներին տրված հանձնարարականների և այլն, հաստատ գիտենք, դա չի լինի: Ինչ վերաբերում է քաղաքական համակրանքին, ապա տարբեր ձևաչափերով մենք դա տեսել ենք, բայց հատուկ ուղղորդումներ չեն լինի: «Ազատ հայրենքիը» Արցախի խորհրդարանում գերակշիռ մեծամասնություն ունի. խորհրդարանական 33 խմբակցություններում 16 անդամ ունի, և նաև կան պատգամավորներ, որոնք շատ ժամանակ «Ազատ հայրենիքի» հետ համաձայնեցված են քվեարկում: Այսինքն՝ Հայաստանի իշխանությունը պարտավոր է համագործակցել «Ազատ հայրենիք» կուսակցության հետ:
Մանրամասն տեսանյութում:
