Լոզանի Դաշնային պոլիտեխնիկական դպրոցի մասնագետները(EPFL) և նրանց ֆրանսիացի գործընկերներն ստեղծել են գերթեթև, շատ ճկուն և ամուր մինի ռոբոտ, որն արտաքինից փոքրիկ բզեզ կամ թիթեռնիկ է հիշեցնում: Ինչպես հայտնել են գյուտարարները, նման փոքր չափի խելացի մեքենաների «պարսերը» կարող են հեռանկարում կիրառում գտնել դժվարամատչելի վայրերում նորոգման աշխատանքներ կատարելիս և միջատների գաղութների վարքն ուսումնասիրելիս: Իրենց հետազոտությունների մասին ռոբոտն ստեղծողները պատմել են Science Robotics հանդեսին՝ տեղեկացնում է TASS-ը:
Ռոբոտը, որն ստացել է “DEANsect” անվանումը, կարող է տեղաշարժվել վայրկյանում 3 սանտիմետր արագությամբ: Այն ստեղծվել է երկու տարբերակով: Առաջինը գործում է գերբարակ և ճկուն հաղորդալարով ստացվող էներգիայի հիման վրա: Ապարատը կարող է ծալվել: Այն այնքան ամուր է, որ ի վիճակի է շարունակել շարժումը, նույնիսկ եթե այն կոշիկով տրորեք կամ խփեք ճանճսպանիչով: Երկրորդ տարբերակով ռոբոտը բացարձակ ինքնավար է. մարտկոցը և մյուս էլեկտրոնային բաղադրիչներն այն կրում է մեջքին: Այդպիսի «բզեզը» կարող է տարբերել լույսն ու մութը, ինչպես նաև տեղաշարժվել՝ հետևելով մակերևույթին նշված գծով, պահպանել շարժունակությունը տարբեր տիպի մակերևույթների վրա: