ԱԺ պատգամավոր Արման Բաբաջանյանը ֆեյսբուքյան իր էջում գրել է.
Այսօր Հայաստանի Հանրապետության վարչապետ Նիկոլ Փաշինյանի և Արցախի Հանրապետության նախագահ Բակո Սահակյանի համանախագահությամբ Երևանում տեղի է ունեցել Հայաստանի և Արցախի Անվտանգության խորհուրդների համատեղ նիստը, որին մասնակցել են նաև Հայաստանի նախագահ Արմեն Սարգսյանը, Հայաստանի և Արցախի խորհրդարանների նախագահներ Արարատ Միրզոյանը և Աշոտ Ղուլյանը:
Նիստի ընթացքում վարչապետ Նիկոլ Փաշինյանը, Արցախի և Հայաստանի նախագահներ Բակո Սահակյանն ու Արմեն Սարգսյանը հանդես են եկել ելույթներով՝ ներկայացնելով արցախյան հակամարտության կարգավորման իրենց տեսլականներն ու մոտեցումները: Մասնավորապես, վարչապետ Նիկոլ Փաշինյանը վերահաստատել է արցախյան հակամարտության կարգավորման հարցում հայկական կողմի մոտեցումը՝ կապված Մադրիդյան սկզբունքների մեկնաբանության ու միարժեք գնահատման հետ, բոլոր ելույթ ունեցողները կարևորել են նաև բանակցային գործընթացին Արցախի մասնակցության հարցը:
Անվտանգության խորհրդի նիստում հնչած ելույթներն անշուշտ կարևոր են, ինչպես որ դրանցում կատարված արձանագրումները: Սակայն թերևս շատ ավելի կարևոր է Հայաստանի և Արցախի Անվտանգության խորհուրդների համատեղ նիստի անցկացումն ինքնին: Սա, հիշեցնեմ, արդեն երկրորդ այս ձևաչափի միջոցառումն է. նախորդ համատեղ նիստը տեղի էր ունեցել այս տարվա մարտի 12-ին՝ Ստեփանակերտում: Հայկական երկու պետությունների Անվտանգության խորհուրդների համատեղ նիստերը այսպիսով հավակնում են ստանալ ինստիտուցիոնալ ու կայուն նշանակություն, ինչը չափազանց կարևոր է ղարաբաղյան հակամարտության կարգավորման գործընթացում Հայաստանի և Արցախի իշխանությունների միակամության, միասնական դիրքորոշման մշակման ու իրագործման տեսանկյունից: Սա էական հանգամանք է՝ հատկապես հաշվի առնելով այն իրողությունը, որ նախորդ երկու տասնամյակների ընթացքում, նախկին իշխանության տարիներին Արցախի ղեկավարությունն ըստ էության մեկուսացված է եղել բանակցային գործընթացից և լավագույն դեպքում ընդամենը տեղեկացվել է դրա ընթացքի մասին:
Այսօր, սակայն, նաև Անվտանգության խորհուրդների համատեղ նիստերի միջոցով Արցախի իշխանությունը գործնականում մասնակից է դառնում բանակցային գործընթացում հայկական կողմի դիրքորոշման մշակմանը, ինչը կարևորագույն քայլ է բովանդակային առումով Արցախի իշխանությանը, իմա նաև՝ Արցախի ժողովրդին բանակցային գործընթացին մասնակից դարձնելու ճանապարհին: Պետք է հույս ունենալ, որ երկու հայկական պետությունների Անվտանգության խորհուրդների համատեղ նիստերը կշարունակվեն նաև ապագայում՝ ինստիտուցիոնալ հիմք դառնալով ղարաբաղյան հակամարտության կարգավորման բանակցային գործընթացում հայկական կողմի ռազմավարության և մարտավարության մշակման ու իրագործման համար:
https://www.facebook.com/babajanyana/posts/2946185118745529?__xts__[0]=68.ARCZbZe4HU6M7sLxWlJePh-Vtj3yT4djoDaoxKjKvPiyg3ZH4w28fUy7NinsEvW6Ju9DbdECJ7NayPmXlDR1coIa6XbMKFTdp0hXmUU40mH67uiTESRD__9GDv2s8FkA2u-ncEHHVG3rdBYjk6DDYP-kUTN-_6We2WRxQYqD4KXo71ihy8ld6xbSlFDQ56s92ilpNNdAwO0S3gmeh_JJJRfUTmf6FJOaeEHvVPoZQljv1BVLv0sNAQ9R07tnxDlaB7MuF8tF9qGvjVEKWcKSfzpPzPvHBCXcCelbdlb69rDz0eEmBREkMgmjtIxeXxGVOwgwBAhVDWthwyqL6UZwmBr0ze0z&__tn__=-R
