Ամերիկյան Twitter միկրոբլոգների ծառայությունը ջնջել է Սաուդյան Արաբիայում ստեղծված գրեթե 6 հազար օգտահաշիվ՝ «հարթակի շահարկման հետ կապված քաղաքականությունը» խախտելու պատճառով։ Այս մասին հայտարարություն է տարածել կայքը՝ գրում է ria.ru-ն։
«Այսօր մենք տրամադրում ենք համապարփակ տվյալներ 5929 հաշիվների վերաբերյալ, որոնք մենք ջնջել ենք հարթակի շահարկման քաղաքականությունը խախտելու պատճառով: Կայքի տեխնիկական իրավիճակի մասնագետների իրականացրած մանրակրկիտ ուսումնասիրությունը թույլ տվեց մեզ վերագրելու այդ հաշիվները Twitter-ում պետության կողմից օժանդակվող խոշոր տեղեկատվական գործողությանը, որը սկիզբ է առնում Սաուդյան Արաբիայից», – ասվում է ընկերության տարածած հայտարարության տեքստում:
Ինչպես հաղորդվում է կայքում, ջնջված օգտահաշիվները «ներկայացնում են ավելի քան 88 հազար օգտահաշիվներից բաղկացած ցանցի մեծ մասը, որը զբաղվում է թեմաների լայն տեսականիի սպամով»: Ըստ Twitter-ի՝ ցանցը «զբաղվում էր պլատֆորմի տարբեր ձևերով շահարկումներով, որոնք ուղղված էին Սաուդյան Արաբիային վերաբերող խոսակցություններին և նրանց աշխարհաքաղաքական հետաքրքրությունների խթանմանը համաշխարհային բեմում»: Հիմնականում հաշիվներում տարածվում էին հաղորդագրություններ, որոնք «նպաստավոր էին Սաուդյան Արաբիայի իշխանությունների համար»: Բովանդակության մեծ մասը արաբերեն է եղել, բայց «մի մասը վերաբերում էր Արևմուտքի լսարանի հետ կապված իրադարձություններին», մասնավորապես Իրանի դեմ պատժամիջոցների կիրառումը և Սաուդյան Արաբիայի իշխանությունների ներկայացուցիչների հայտնվելը արևմտյան լրատվամիջոցներում: Հաշիվների այս ցանցի աշխատանքը դադարեցված է:
