Ճապոնական Toyota Motor ավտոկոնցեռնը 2013 ֆինանսական տարում, որն ավարտվել է 2014-ի մարտի 31-ին, ամբողջ աշխարհում 10 մլն 130 հազար ավտոմեքենա է իրացրել: ITAR-TASS-ի տեղեկացմամբ՝ այս մասին չորեքշաբթի օրը հայտնել է ընկերությունը:
Այսպիսով, Toyota-ն աշխարհում առաջին ավտոընկերությունն է, որը 12 ամսում վաճառքի ծավալներով հատել է 10 միլիոնի սահմանագիծը: 2012 ֆինանսական տարվա համեմատ՝ Toyota-ն վաճառքի ծավալները մեծացրել է մոտ կես միլիոնով:
Ընկերությունը համաշխարհային առաջատարն է մնացել նաև վերջին եռամսյակի արդյունքներով՝ 2014-ի հունվար-մարտ ամիսներին իրացնելով 2,58 մլն ավտոմեքենա: Toyota-ն երրորդ եռամսյակն անընդմեջ առաջ է անցնում իր մոտ մրցակիցներից՝ General Motors-ից և Volkswagen-ից, որոնք 2014-ի առաջին եռամսյակում 2,4 մլն-ական մեքենա են վաճառել:
