Այն, որ ԱՄՆ նախագահ Դոնալդ Թրամփը խախտել է ամերիկյան սահմանադրությունը, հաստատված փաստ է: Նման հայտարարություն է արել ներկայացուցիչների պալատի խոսնակ Նենսի Փելոսին ամերիկյան առաջնորդի իմպիչմենթի վերաբերյալ խորհրդարանական քննարկումների ժամանակ: Բանավեճի և քվեարկության հեռարձակումը YouTube-ում իրականացնում է FOX հեռուստաալիքը:
«Այն, ինչ մենք այսօր քննարկում ենք, հաստատված փաստ է. նախագահը խախտել է սահմանադրությունը»,- ասել է Փելոսին: Նա հայտարարել է, որ Թրամփը սպառնալիք է ամերիկյան պետության ազգային անվտանգության համար, և որ օրենսդիրներն այլընտրանք չունեն, քան նրան իշխանությունից հեռացնելու օգտին հանդես գալը՝ կատարած հանցագործությունների պատճառով:
Եթե խորհրդարանի ստորին պալատը որոշում ընդունի Միացյալ Նահանգների ղեկավարի իմպիչմենթի վերաբերյալ, հարցը կքննարկվի սենատում՝ վերին պալատում:
Դեկտեմբերի 5-ին իմպիչմենթի գործընթացը վարող իրավաբանական հանձնաժողովի ղեկավար Ջերալդ Նադլերը հայտարարել է, որ կան բավարար հիմքեր Միացյալ Նահանգների ղեկավարին հեռացնելու համար: Ըստ նրա, Թրամփը մեղավոր է լիազորությունները չարաշահելու և Կոնգրեսի աշխատանքը խոչընդոտելու մեջ:
