Երբ օրեր առաջ հայտնի դարձավ, որ Հայաստանի նախկին վարչապետ Կարեն Կարապետյանը նշանակում է ստացել Դմիտրի Մեդվեդևի աշխատակազմում՝ այդ լուրը, մեղմ ասած, որևէ մեկին չզարմացրեց։ Նախկին համակարգն ամուր պորտալարով կապված է ռուսական իշխանության հետ ու պատահական չէ, որ օդիոզ կերպարները թաքստոց են գտնում Ռուսաստանում՝ թաքնվելով հայկական արդարադատությունից։
Կոնկրետ Կարեն Կարապետյանի մասով տեղի ունեցածը նույնիսկ օրինաչափ է, որովհետև նրա համար Ռուսաստանը «հայրենիք» է, որտեղից նա պարբերաբար գործուղվել է Հայաստան՝ խիստ որոշակի առաքելությամբ։ Երևանի քաղաքապետի խիստ պատվաբեր ու պատասխանատու պաշտոնը 2011-ին նա թողեց, որովհետև Ռուսաստանից ստացել էր բարձր ռոճիկով առաջարկություն՝ երրորդական-չորրորդական կարգավիճակով։ 2016-ին Կարապետյանը կրկին «գործուղվեց» Հայաստան՝ այս անգամ մեր երկրի «աբխազացման» գործընթացն իրականացնելու նպատակով, ինչը, բարեբախտաբար, կանխվեց թավշյա հեղափոխության շնորհիվ։
Ինչը Կարապետյանի պարագայում «օրինաչափություն» է, ապա արտառոց է հետհեղափոխական առաջին իշխանության առանցքային պաշտոնյաների դեպքում։ ԱԱԾ նախկին տնօրեն Արթուր Վանեցյանն, ըստ ԶԼՄ-ների, իր քաղաքական բենեֆիսը նախապատրաստում է ռուսական կապիտալի ու կլիշեների միջոցով։ Վանեցյանի ու Կադիրովի մտերմությունը հավաստող լուսանկարը լավագույնս բացահայտում է ԱԱԾ նախկին տնօրենի քաղաքական այցեքարտը, արժեքային համակարգը։
Այսօր պաշտոնապես հաստավեց մեկ այլ լուր։
ՀՀ նախկին ոստիկանապետ Վալերի Օսիպյանը Ռուսաստանի Դաշնությունում նոր աշխատանք ունի: Այն մարդը, որին հեղափոխությունից հետո վստահվել էր ՀՀ ամենաառանցքային կառույցներից մեկի ղեկավարի պաշտոնը, պարզվում է՝ իր քաղաքական հովանավորյալ՝ Մոնարխ անունով հայտնի Արմեն Գինոսյանի մոտ անվտանգության պետ է աշխատում. ՀՀ նախկին ոստիկանապետը, ՀՀ ոստիկանության գեներալ-մայորը՝ ռուսաստանցի մեծահարուստ, քրեական հեղինակության անվտանգության պետն է՝ զգալի բարձր աշխատավարձով: Սա իրապես խայտառակություն է։
Օսիպյանը պաշտոնանկությունից հետո չի հանդիպել Փաշինյանին և նոյեմբերի 20-ից հետո մեկնել է ՌԴ՝ իր նոր աշխատանքին: Մամուլն ավելի վաղ գրել էր, թե Վալերի Օսիպյանը պաշտոնավարման 1 տարի 4 ամսվա ընթացքում դարձել է 3 բնակարանի և 1 թանկարժեք ավտոմեքենայի սեփականատեր և ոստիկանության պետի պաշտոնում նշանակվելուց մի քանի ամիս անց Երևանի Նուբարաշեն վարչական շրջանից բնակության է տեղափոխվել Կենտրոն համայնք։ Ավելորդ է ասել, որ Օսիպյանի «թրփոշացումը» տեղի է ունեցել նույն Մոնարխի անմիջական մասնակցությամբ ու մնում է ենթադրել, թե դրա դիմաց նախկին ոստիկանապետն ինչ ծառայություններ է մատուցել քրեականացված օլիգարխին։
Ստեղծված իրավիճակի հիմնական քաղաքական պատասխանատուն, անշուշտ, Նիկոլ Փաշինյանն է, որը հեղափոխության հաղթանակից հետո միջին կալիբր ունեցող գեներալներին հռչակեց որպես կոռուպցիայի դեմ պայքարի «Ռոբին Հուդ»-ներ՝ նրանց օժտելով նախարարական կարգավիճակով ու գեներալական ուսադիրներով։
Վանեցյանն ու Օսիպյանը ագահորեն խժռեցին հեղափոխության ռեսուսրները, Փաշինյանի վարկանիշը՝ ապահովելով իրենց քաղաքական ու անձնական կոմֆորտը։ Անցած մեկուկես տարիներին ոստիկանությունն ու ԱԱԾ-ն այդպես էլ չբարեփոխվեցին ինստիտուցիոնալ մակարդակում ու, ցավոք, չկա ոչ մի երաշխիք, որ առաջիկայում չենք ունենա նոր վանեցյաններ ու օսիպյաններ։ Համենայնդեպս, իրավապահ համակարգի այսօրվա էլիտայից այլ որակ սպասել հնարավոր չէ։
Լուսանկարը՝ Armeniasputnik-ի
