«Անցած մեկուկես տարվա ընթացքում նախկին իշխանության որևէ կանխատեսում և որևէ հայտարարություն՝ Արցախի հետ կապված վտանգավոր զարգացումների վերաբերյալ, իրականություն չդարձավ, և նախկին իշխանություններն ուղղակի հայտնվեցին շատ ծիծաղելի իրավիճակում: Այսինքն՝ նախկին իշխանությունները և նրանց խոսքը արժեզրկվել են՝ նույնիսկ անհնարինի չափով»,- «Առաջին լրատվական»-ի հետ զրույցում նշեց քաղաքագետ Ստեփան Սաֆարյանը:
Քաղաքագետի խոսքով՝ քանի որ նրանց խոստացած թեժ աշունը չստացվեց, այժմ կառչում են Ադրբեջանի արտգործնախարար Մամեդյարովի հայտարարության խոսքերից և դրանք բերում են հայկական մեդիատարածություն՝ մի կողմ թողնելով պաշտոնական Երևանի բոլոր պարզաբանումները և շարունակելով շահարկումները:
«Երկրորդ մոտիվացիան, որը չափազանց լուրջ է, այն է, որ նախկին իշխանությունները փորձում են իրենց վրեժը լուծել գործող իշխանություններից՝ իրենց հետ գործարքի չգնալու և խորհրդարանում չհայտնվելու համար, և կրկին դիրքավորվում են այդ ճանապարհի վրա»,- նկատեց մեր զրուցակիցը:
Ստեփան Սաֆարյանը, անդրադառնալով երրորդ պատճառին, ասաց. «Նրանք Նիկոլ Փաշինյանից պահանջում են անել այն հայտարարությունը, որն արել է Սերժ Սարգսյանը, այն է՝ «Արցախը երբեք չի լինելու Ադրբեջանի կազմում»: Հետագայում այս հայտարարությունը պրոբլեմ դարձավ՝ եթե Արցախը Ադրբեջանի կազմում չի կարող լինել, Հայաստանինը չէ, ապա ո՞ւմը կարող է լինել: Այստեղ ծնվեց Լավրովյան պլանը՝ եթե ձերը չէ, եթե նրանցը չէ, ուրեմն կարող է լինել մերը: Եվ Լավրովյան պլանը վերաբերում էր ռուսական պրոտեկտորատը Արցախի նկատմամբ տարածելուն՝ խաղաղապահ ուժեր տեղակայելու միջոցով»:
Ստեփան Սաֆարյանը ընդգծեց՝ սա Սերժ Սարգսյանի փայլուն գովերգված բանաձևի տխուր հետևանքն էր, որը մեր հայորդիները 2016-ի ապրիլին կանխեցին սեփական արյան և կյանքի գնով:
Քաղաքագետի խոսքով՝ այժմ Նիկոլ Փաշինյանին փորձում են մտցնել այդ նույն գետը, որպեսզի Արցախյան խնդրի բանակցությունների առումով նա դառնա նախկին իշխանությունների իրավահաջորդը և կրկնի Սերժ Սարգսյանի հայտարարությունները. «Նրանք հավանաբար հասկանում են, որ այդ ճանապարհը տանում է դեպի իշխանափոխություն, ինչպես և Սերժ Սարգսյանի դեպքում այն բավականին լուրջ նպաստեց. հենց այս բանաձևը տարավ պատերազմի»:
Հարցազրույցն ամբողջությամբ՝ տեսանյութում:
