Գործադիր մարմինը հաստատել է Ապօրինի ծագում ունեցող գույքի բռնագանձման մասին օրենքի նախագիծը: Արդյո՞ք սա ամենաճիշտ, շահարկումներից զերծ ճանապարհն է, որով պատրաստվում ենք գնալ. կա նաև հանրային կոնսոլիդացիա այն հարցի շուրջ, որ թալանվածը պետք է վերադարձվի: Թեմայի շուրջ «Առաջին լրատվական»-ի հետ զրույցում արդարադատության փոխնախարար Սրբուհի Գալյանը նշեց. «Սկզբնական շրջանում գործածվում էր, բայց այժմ այլևս չի գործածվում «առանց մեղադրական դատավճռի» հասկացությունը: Այս օրենքով հստակ նշվում է, որ ապօրինի ծագում ունեցող գույքը կարող է բռնագանձվել միայն դատարանի որոշման հիման վրա»: Փոխնախարարի խոսքով՝ օրենքի նախագծի ընդունման արդյունքում ակնկալվում է ապօրինի ծագում ունեցող գույքը տնտեսական շրջանառությունից հանել և վերադարձնել օրինական տնտեսական շրջանառություն, այսինքն՝ պետբյուջե:
«Ըստ էության սա վարույթ է գույքի դեմ, որը սակայն որոշակի առումով փոխկապակցված է նաև կոնկրետ ֆիզիկական անձի հետ: Նախագիծը որևէ պարագայում պատժիչ նշանակություն չի կարող ունենալ, այսինքն՝ այս նախագծով անձին պատժելու կամ պատասխանատվության ենթարկելու նպատակ չի հետապնդվում,- նշեց փոխնախարարը: -Քրեական պատասխանատվության ենթարկելն այս օրենքի կարգավորման շրջանակներից դուրս է: Եթե կհայտնաբերվեն հանցագործության հատկանիշներ, ապա վարույթ իրականացնող մարմինները հնարավորություն կունենան նախաձեռնել քրեական վարույթ… Պաշտոնյաները պարտավորություն կունենան ապացուցելու իրենց գույքի օրինականությունը»:
Խնդրահարույց է համարվում դատական համակարգի վրա ճնշումների հարցը. դատավորների մի մասը պնդում է, որ օրենսդիր և գործադիր մարմինների կողմից ճնշումներ կան դատավորների վրա, մյուս մասը պնդում է, որ չկա: Անդրադառնալով այս դիտարկմանը՝ Սրբուհի Գալյանը նշեց, որ մինչև 2018թ. հասարակության լայն շերտերի ընկալման մեջ դատական համակարգը ամենակոռումպացված համակարգն է եղել, իսկ ներկայումս փոփոխությունն էական է. «Քաղաքական ճնշումների, գործադիրի և օրենսդիրի կողմից ճնշումների մասին խոսք լինել չի կարող»: «Դատավորների տերը Նիկոլ Փաշինյանը չէ»,- ընդգծեց փոխնախարարը` հավելելով, որ Հայաստանում այլևս բրգաձև կոռուպցիա չկա: Նա նաև հավելեց, որ արդարադատության նախարարությունը հեղափոխությանը դիմադրողների թվում չէ:
Մանրամասն՝ տեսանյութում: