Դեկտեմբերի 13-ին, 14-ին և 15-ին «Անտարես» հրատարակչությունն ու «Դարան» գրախանութը կազմակերպում են արդեն ավանդական դարձած գրատոն, որի ընթացքում տեղի կունենան նոր լույս տեսած գրքերի շնորհանդեսներ, ինչպես նաև հանդիպումներ սիրված հեղինակների ու թարգմանիչների հետ։
«Նախաձեռնության նպատակն է ընթերցասերների համար գրքի տոն կազմակերպելը․ ես դեմ եմ, որ գրքի մասին հիշեն միայն փետրվարի 19-ին՝ գիրք նվիրելու օրը, այլ պետք է տարվա մեջ մի քանի այլ օրեր էլ լինեն՝ գրքերի մասին խոսելու, գրքի տոն դարձնելու համար։ Օրինակ՝ Գերմանիա պետությունն ունի 121 ծրագիր, որոնք միտված են ընթերցանության մակարդակի բարձրացմանը, իսկ Հայաստանում, ցավոք սրտի, միայն այս մի ծրագիրն է, որ «Անտարես»-ն իր գործընկերների հետ համատեղ փորձում է իրականացնել և կարծում եմ, որ ընթերցանությունն այսպես խրախուսելը կբերի լուրջ արդյունքների։ Երբ ընդհանուր առմամբ խոսում ենք ընթերցանության պակասի մասին, ապա, ցավոք, դա վերաբերում է միայն Հայաստանին ու Ադրբեջանին, բայց օրինակ Թուրքիայում գրքի բում է, ԱՄՆ-ում տարեկան 10%-ով աճում է թղթե գրքի վաճառքը, Ռուսաստանում նույնպես աճում է, Գերմանիայում, Բելառուսում, Ուկրաինայում և բազմաթիվ այլ երկրներում աճում է և միայն Հայաստանում է, որ նվազում է, օրինակ հենց այս տարի 31%-ով անկում ունենք»,- «Առաջին լրատվական»-ի հետ զրույցում ասաց «Անտարես» հրատարակչության տնօրեն Արմեն Մարտիրոսյանը։
Նշենք նաև, որ այցելուներն այս երեք օրերի ընթացքում հնարավորություն կունենան իրենց նախընտրած գիրքը ձեռք բերել 20-70% զեղչով։
Մանրամասները՝ տեսանյութում։
