Լեհաստանը և ԱՄՆ-ը պայմանավորվել են համատեղ զորավարժություններ անցկացնել: Այս մասին տեղի հեռուստաալիքի եթերում երեքշաբթի օրը հայտնել է Լեհաստանի պաշտպանության նախարար Տոմաշ Սեմոնյակը՝ ամփոփելով Վաշինգտոնում իր բանակցությունների արդյունքները, հայտնում է ITAR-TASS-ը:
«Մենք գործողությունների մի ամբողջ շարք ենք ծրագրել առաջիկա օրերին և շաբաթներին, որոնք ցույց կտան ԱՄՆ-ի ռազմական ներկայությունը»,- ասել է Սեմոնյակը՝ հիշեցնելով, որ Պենտագոնը որոշել է առնվազն մինչև 2014-ի վերջ լեհական տարածքում թողնել ամերիկյան F-16 կործանիչները, որոնք Լասկի ավիաբազայում են օդաչուների դասընթացների համար:
Սեմոնյակը չի բացահայտել Վաշինգտոնում իր ձեռք բերած պայմանավորվածությունների մանրամասները:
«Մենք պայմանավորվեցինք ուսումնավարժանքների շարքի վերաբերյալ, քանի որ չենք ուզում, որ ամերիկացիները գան մեզ մոտ ու անգործ նստեն: Մենք ուզում ենք, որ նրանք մարզվեն: Վաղ թե ուշ բոլորը կիմանան՝ որտեղ և երբ կլինի: Տարբեր՝ փոքր և մեծ զորավարժությունների միջև ընդմիջում չի լինի: Խոսքը տեսանելի ներկայության մասին է»,- ասել է նա:
Ավելի վաղ Սեմոնյակը հույս էր հայտնել, որ պաշտպանության ոլորտում լեհ-ամերիկյան համագործակցությունը կհաջողվի ամենաբարձր մակարդակի հասցնել:
