ԱՄՆ Սենատի կողմից Հայոց ցեղասպանությունը ճանաչող բանաձևի ընդունումից հետո ԱՄՆ Հայ Դատի արևմտյան գրասենյակը ևս հանդես է եկել հայտարարությամբ։
«Պատմության մեջ առաջին անգամ է, որ Սենատը իր պաշտոնական դիրքորոշումն է հայտնում այս կարևորագույն պատմական հարցի կապակցությամբ։
Ներկայացուցիչների Պալատի 296-րդ և Սենատի 150-րդ բանաձևերը միմյանցից անկախ են և արտահայտում են առանձին պալատների դիրքորոշումները, ընթացակարգով չեն պահանջում ԱՄՆ նախագահի ստորագրությունը։ Այսպիսով կարող ենք արձանագրել, որ ԱՄՆ օրենսդիր իշխանությունը ամբողջովին ճանաչել է Հայոց Ցեղասպանությունը:
Միանման երկու բանաձևերը ունեն երեք կարևոր ուղերձ՝
1. Բացառվում է ԱՄՆ-ի մասնակցությունը թուրքական կառավարության ժխտողական քաղաքականությանը
2. Խրախուսվում են ԱՄՆ-ի կողմից այդ հանցագործության մասին հիշատակման միջոցառումները
3. Աջակցում են ԱՄՆ հանրակրթական հաստատություններում Ցեղասպանության առարկայի դասավանդմանը՝ հետագայում ննմանատիպ հանցագործություններ կանխարգելելու նպատակով
ԱՄՆ Սենատը օժտված է դեսպանների ու այլ բարձրաստիճան պաշտոնյաների նշանակումների հաստատման ուժով, ուստի բոլոր առաջադրվող թեկնածուները պետք է այլևս հետևեն Կոնգրեսի պաշտոնական քաղաքականությանը, այլապես վտանգի կենթարկեն իրենց հեղինակությունն ու աշխատանքը», – ասվում է հայտարարությունում։