Լիտվայի գիտությունների ակադեմիայիում Լիտվայում ՀՀ դեսպանության նախաձեռնությամբ և կազմակերպմամբ դեկտեմբերի 9-ին տեղի է ունեցել թուրք հայտնի պատմաբան, պրոֆեսոր Թաներ Աքչամի և Նյու Յորքի Մանհեթթենվիլի քոլեջի փիլիսոփայության պրոֆեսոր, փիլիսոփայության ֆակուլտետի դեկան Շվոն Նաշ-Մարշալի դասախոսությունները՝ նվիրված Հայոց ցեղասպանության ժխտողականությանը, Լիտվայի գիտությունների ակադեմիայի անդամ, պատմաբան Էգիդիյուս Ալեքսանդրյավիչիուսի մասնակցությամբ։
Դասախոսությունների ընթացքում Աքչամը ներկայացրել է Հայոց ցեղասպանության հարցում թուրքական ժխտողականության դրսևորումները, խոսել է իր վերջին՝ «Սպանության հրամաններ» գրքում ցեղասպանությունն իրագործած պարագլուխների և նրանց կողմից ուղարկված գաղտնի հեռագրերի վերծանման մասին։ Աքչամը նշել է, որ թուրքական ժխտողականության զինանոցում գտնվող այն պնդումները, թե կեղծիք են Թալեաթ փաշայի հեռագրերը, որոնք հրապարակվել են Արամ Անտոնյանի միջոցով, այլևս չեն դիմանում քննադատության, քանի որ անհերքելի ապացույցներ են ներկայացվել դրանց փաստացիության վերաբերյալ։
Շվոն Նաշ-Մարշալն իր հերթին նշեց, որ ժխտողականությունը Թուրքիայում դրված է օրենդրական հիմքի վրա, ինչն անհնար է դարձնում հաշտեցման և սեփական պատմության հետ առերեսման ցանկացած փորձ։
Միջոցառմանը եզրափակիչ խոսքով հանդես եկավ Լիտվայում ՀՀ դեսպան Տիգրան Մկրտչյանը, ով շնորհակալություն հայտնելով բանախոսներին իրենց դասախոսությունների համար, ներկայացրեց օրվա խորհուրդը, միջազգային ասպարեզում Հայաստանի գործադրած ջանքերը ցեղասպանության զոհերի հիշատակման և նոր ցեղասպանությունների կանխարգելման ուղղությամբ։