ՀՀ իշխանությունները Ջավախքում չպետք է գնան Պուտինի հետքերով: «Առաջին լրատվական»-ի հետ զրույցում ասաց Վրաստանի դիվանագիտական ակադեմիայի ռեկտոր, քաղաքագետ Սոսո Ցինցաձեն՝ անդրադառնալով հայ-վրացական հարաբերություններին՝ Հայաստանի արտաքաղաքական պրոռուսական վեկտորի պայմաններում և տեսակետներին, թե Հայաստանը կարող է օգտագործվել Ռուսաստանի կողմից Վրաստանի դեմ:
Նա նշեց, որ ինքը ևս տեղյակ է, որ ապրիլի 29-ին Հայաստանը չի ստորագրի ՄՄ անդամակցության փաստաթուղթը, այլ պարզապես որոշ ժամկետներ կհաստատի՝ այն դեպքում, երբ նախկինում ասվում էր, որ ապրիլի 29-ին Հայաստանը կմիանա ՄՄ-ին: Ըստ նրա՝ կարծես թե հայաստանյան դիվանագետները որոշել են խաղարկել այս հարցը, և այս անգամ, այս փուլում եթե այս տեղեկատվությունը հավաստի է, ապա ստացվում է՝ Հայաստանը պարզապես հիմա պատրաստ է նշանակել իր հետագա քայլերը, բայց ոչ ստորագրել:
«Սա դրական տրամադրություն է առաջացնում: Ամեն դեպքում ես չեմ կարծում, որ Հայաստանը կարող է օգտագործվել Վրաստանի դեմ՝ ոչ այն պատճառով, որ Պուտինը դա չի ցանկանա, այլ այն պատճառով, որ դա հակասում է Հայաստանի ազգային շահերին, քանի որ եթե, Աստված չանի, այդպիսի միություն լինի Վրաստանի դեմ, ապա ավտոմատ կերպով կակտիվացնի Ադրբեջանի կտրուկ դիվանագիտական հակահայկական ակտիվությունը, սա ամենավատ սցենարն է և՛ Ադրբեջանի, և՛ Վրաստանի, և՛ Հայաստանի համար: Ես չեմ կարծում, որ նման մղձավանջի մեկնարկը կարող է դնել Հայաստանը, քանի որ հայաստանյան ղեկավարությունը վերջին տարիների ընթացքում իրեն դրսևորել է որպես սթափ մտածող կառույց, և սթափ մտածող քաղաքական գործիչները այդպիսի ճակատագրական քայլերի չեն գնա, ես դրան չեմ հավատում:
Միգուցե ես ավելի լավ պատկերացում ունեմ Հայաստանի դիվանագիտական վեկտորի մասին, բայց ամեն դեպքում հույս ունեմ, որ հայաստանյան ղեկավարությանը համարձակությունը կբավարարի, որ չգնան այդպիսի քայլի»,- ասաց վերլուծաբանը:
Հարցին՝ չի՞ տեսնում արդյոք Հայաստանի ու Վրաստանի միջև ոչ պաշտոնական պայմանավորվածությունների անհրաժեշտություն, Ցինցաձեն պատասխանեց, որ Հայաստանի և Վրաստանի միջև ոչ պաշտոնական համաձայնություն կամ պայմանավորվածություն արդեն վաղուց գոյություն ունի: «Երկու կողմերը երբեք չեն օգտագործի իրենց ռեսուրսները միմյանց դեմ, դա չեն արել նաև նախկինում: Լուռ համաձայնություն կա և պրակտիկայում ևս կա»,- ասաց նա:
Սոսո Ցինցաձեն անդրադարձավ նաև տեղեկություններին, թե Ջավախքի էթնիկ հայերը վերջերս սկսել են ավելի մեծ թափով ռուսական անձնագրեր ստանալ, որը կարող է այս շրջանում ռուսական էսկալացիայի առիթ դառնալ: Նա նշեց, որ նման վտանգ իսկապես գոյություն ունի, թեև վրացական իշխանությունները հերքում են դա:
«Հայաստանի ղեկավարությունն ամենալավ բանը, որ կարող է անել և Հայաստանի, և Վրաստանի համար, և մեր բարեկամության համար, դա որոշակիորեն ազատվելն է Ջավախքի անջատողականներից, իսկ այդ անջատողականների առաջնորդն ապրում է Երևանում, նույնիսկ ԱԺ պատգամավոր է, խոսքը Շիրակ Թորոսյանի մասին է: Այնպես որ, ամենագլխավորը սա է, որոշակի հեռավորություն պահել այս մարդկանց հետ և չդրսևորվել այնպես, ինչպես Պուտինը՝ Ուկրաինայում աջակցելով անջատողական միտումներին: Իր սեփական շահերից ելնելով՝ իշխանությունը չպետք է Պուտինի հետքերով գնա: Իսկ այն, որ Ջավախքի հայության շրջանում կա անջատողական տրամադրություն՝ գաղտնիք չէ: Ես չեմ ողջունում նաև այն, որ վրացական նոր իշխանություններն ազատ արձակեցին Վահագն Չախալյանին»,- ասաց Սոսո Ցինցաձեն:
