Այսօր՝ դեկտեմբերի 9-ին, Ազգային ժողովում շարունակվում է հերթական նստաշրջանի աշխատանքը: Այժմ քննարկվում է 2016թ. ապրիլին ծավալված ռազմական գործողությունների հանգամանքները ուսումնասիրող քննիչ հանձնաժողովի գործունեության ժամկետը երկարաձգելու մասին ԱԺ որոշման նախագիծը:
Դիմելով քննիչ հանձնաժողովի նախագահ Անդրանիկ Քոչարյանին՝ պատգամավոր Արման Բաբաջանյանը նկատեց, որ քաղաքական շահարկումներ եղել են և կլինեն. «Դիմադրությունների հանդիպե՞լ է հանձնաժողովը: Վերջապես ե՞րբ սպասենք Խաչատուրովի, Բաղմանյանի և Սերժ Սարգսյանի հարցաքննություններին»:
Ի պատասխան՝ Անդրանիկ Քոչարյանն ասաց, որ հանձնաժողովը դիմադրությունների չի հանդիպել. «Գուցե եղել են չհասկացվածության պահեր, բայց հանձնաժողովն իր կազմով կարողացել է հաղթահարել այդ պահերը: Ինչ վերաբերում է հրավիրյալներին, ապա ձեր մատնանշած մարդկանց հանձնաժողովը, այո՛, պարտավոր է լսել՝ ընդհուպ մինչև ՀՀ նախագահի պաշտոնը ստանձնած Սերժ Սարգսյանը, որովհետև ինքն այդ ժամանակ իրականացրել է գլխավոր հրամանատարի գործառույթ: Կուտակված հարցերի վերջնական պատասխանները պետք է ստանանք նաև պարոն Սերժ Սարգսյանից»:
Ինչ վերաբերում է Արցախի պաշտոնյաների հետ համագործակցությանն առնչվող պատգամավորի հարցին, Անդրանիկ Քոչարյանն ասաց. «Մենք ունենք լիարժեք ընկալում նրանց կողմից: Իսկ Վիտալի Բալասանյանի հայտարարությունները հիմնականում եղել են քաղաքական բնույթի»:
Մանրամասները՝ տեսանյութում: