Աղվերանում շուրջ 3 օր տևած ՀՅԴ Գերագույն ժողովն ավարտել է աշխատանքը և ԳՄ-ն նոր կազմ է ընտրել:
Ըստ այդմ՝ ՀՅԴ ԳՄ նոր անդամներ են դարձել ԱԺ նախկին պատգամավոր Լիլիթ Գալստյանը, Սամվել Երանյանն ու Պետրոս Մեղրյանը: ԳՄ-ի անդամությունից հրաժարվել են արդեն նախկին ԳՄ-ականներ Սպարտակ Սեյրանյանն ու Արսեն Համբարձումյանը:
Այսօր ժամը 17-ին ՀՅԴ ԳՄ-ն նոր կազմով ժողով է անելու Երևանում, որից հետո, թերևս, հանդես կգա հայտարարությամբ: Նոր ԳՄ-ի կազմում են ԱԺ ՀՅԴ ֆրակցիայի ներկայացուցիչներ Արմեն Ռուստամյանը, Արծվիկ Մինասյանը, Աղվան Վարդանյանը, Միքայել Մանուկյանը, ինչպես նաև Արտաշես Նիկոյանը, Վարդան Ալեքսանյանը, Հրաչ Թադևոսյանը, Պետրոս Մեղրյանը, Սամվել Երանյանը, Լիլիթ Գալստյանը և այլք:Նշենք, որ ՀՅԴ ԳՄ անդամ ընտրվելու համար պետք է առնվազն 8 տարվա դաշնակցական լինել և անդամակցել կուսացության տարբեր մարմինների և կոմիտեների:
«Առաջին լրատվական»-ին հայտնի է դարձել, որ Աղվերանում անցկացված ՀՅԴ գերագույն ժողովը պաշտպանել է իշխանական կոալիցիա չմտնելու՝ ԳՄ-ի որոշումը:
ԳՄ որոշման մեջ մասնավորապես ասված էր. «ՀՅ Դաշնակցությունը ձևակերպել է համակարգային փոփոխությունների, նոր որակի պետություն ստեղծելու, արդյունավետ կառավարում ապահովելու իր պատկերացումները, որոնք ամփոփված են քաղաքական ու տնտեսական առաջադրանքների յոթ կետանոց փաթեթում: Վստահ ենք` դրանց քայլ առ քայլ, բայց ամբողջական իրականացումը երկիրը դուրս կբերի ծանրագույն վիճակից և մեր քաղաքացիների համար ազատ ու բարեկեցիկ կյանք կերաշխավորի: Մենք հետևողականորեն պահանջելու ենք այդ ծրագրի կենսագործումը` ձգտելով մեր սկզբունքների շուրջ համախմբել հասարակության լայն զանգվածներին ու քաղաքական ուժերին:
Այս հանգրվանում ՀՅԴ Հայաստանի Գերագույն մարմինը որդեգրում է հետևյալ մոտեցումները.
1.- Մաս չկազմել նոր ձևավորվող կառավարությանը:
2.- Հետևել իշխանության և կառավարության գործողություններին, նրանց հանդեպ մեր վերաբերմունքն ու գործակցության ձևաչափը պայմանավորել առաջարկված փաթեթի իրագործման աստիճանով:
3.- Շարունակել գործել ընդդիմադիր դաշտում` մի կողմից ձգտելով հանրությանն ու քաղաքական ուժերին համախմբել մեր դավանած ազգային-պետական արժեքների, մեր առաջարկած լուծումների շուրջ, մյուս կողմից` փորձելով մեր երկիրը զերծ պահել ցնցումներից ու անկայունությունից:
Մեր նպատակը եղել և մնում է Հայաստանի պետականության հզորացումը, մեր քաղաքացիների արժանապատիվ, բարեկեցիկ կյանքը»:
