Եվրոպացի ներդրողների համար շատ անպատասխան հարցեր կան, հուսով ենք, որ վարչապետ Աբրահամյանը շուտով հանդես կգա հստակ պատասխաններով: «Առաջին լրատվական»-ի հետ զրույցում այս մասին ասաց Հայ-բելգիական առևտրի պալատի նախագահ Վալերի Սաֆարյանն՝ անդրադառնալով Հովիկ Աբրահամյանի վարչապետի պաշտոնում նշանակմանն ու Աբրահամյանի վարչապետության պայմաններում ՀՀ-Եվրոպա առևտրական կապերի, ներդրումային դաշտի զարգացման իր տեսլականը ներկայացնելով:
Նա նշեց, որ Հայ-բելգիական առևտրի պալատը շնորհավորում է Հովիկ Աբրահամյանին ՀՀ վարչապետի պաշտոնում նշանակվելու կապակցությամբ՝ անկեղծորեն հուսալով, որ նոր վարչապետի առաջնահերթություններից մեկը կլինի մայիսին կայանալիք Եվրոպական հանձնաժողովի և Եվրախորհրդարանի ընտրություններից հետո այս կառույցների հետ հարաբերությունների նոր շրջանակի զարգացմանը որքան հնարավոր է՝ շատ ժամանակ ու ջանքեր տրամադրելը: Վալերի Սաֆարյանն ասաց, որ հավատում են, թե երկու կողմերում նոր թիմերը հնարավորություն կտան վերանայելու Հայաստանի և ԵՄ-ի միջև համագործակցության շրջանակը:
«Հայաստանը վերջին 20 տարիների ընթացքում ունեցել է շատ լավ հավասարակշռված հարաբերություններ թե ԵՄ-ի և թե ՌԴ-ի հետ: Մենք կասկած չունենք, որ պարոն Աբրահամյանը բավարար չափով ուժեղ է քաղաքական դաշտում Ռուսաստանի հետ անկեղծորեն խոսելու և բացատրելու համար, որ բացի Մաքսային միությունից, որը կմնա հայաստանյան օրակարգի ամենաբարձր առաջնահերթությունը, Հայաստանը գտնելու է նոր քաղաքական և տնտեսական պրոյեկտներ ու համաձայնագրեր ԵՄ-ի հետ»,- ասաց Սաֆարյանը՝ հավելելով, որ Հայաստանը պետք է շարունակի կենտրոնացած լինել արտասահմանյան և եվրոպական ներդրումներ գտնելու վրա, Հայաստանը պետք է իր գործընկերոջը ցույց տա, որ Հայաստանի ՄՄ անդամակցությունը լավ պատրաստված պրոյեկտ է: Նրա կարծիքով՝ Հայաստանն այս կազմակերպությունում պետք է առաջնորդություն ստանձնի, քանի որ Հայաստանի կառուցվածն ու տնտեսության կառուցվածն ավելի համապատասխանում են եվրոպական սպասելիքներին, քան ՄՄ այլ անդամ երկրների դեպքում։ Կասկած չկա, որ հայաստանյան արժեքներն ու Հայաստանի տեսլականն ազատական տնտեսության, բաց հասարակության, Արևելքի ու Արևմուտքի միջև լավ հավասարակշռված հարաբերությունների առումով պետք է պահպանվեն և ցցուն լինեն նաև ՄՄ-ում եվրոպական ներդրումներ գրավելու համար:
«Սրանք դեռևս անպատասխան, բաց հարցեր են, ուստի լիահույս ենք, որ շուտով վարչապետ Աբրահամյանը հանդես կգա հստակ պատասխաններով»,- նշեց Վալերի Սաֆարյանը:
