2011 թ. առաջին եռամսյակում Google ընկերության մաքուր շահույթը կազմել է 4.304 մլրդ դոլար: Ինչպես ասվում է ընկերության ֆինանսական հաշվետվությունում, 2011 թ. առաջին եռամսյակում մաքուր շահույթը 13.4%-ով ավելի է, քան նախորդ տարվա նույն ժամանակահատվածում:
Առաջին եռամսյակի ընդհանուր շրջանառությունը կազմել է 17.602 մլրդ դոլար, ինչը 29.4%-ով ավելի է, քան նախորդ տարվա նույն ժամանակահատվածում: Ապրիլ-հունիս ամիսներին Google-ն ապահովել է արդեն 2.505 մլրդ դոլարի մաքուր շահույթ, ինչը 36.1% ավելի է, քան նախորդ տարի: Նույն` երկրորդ եռամսյակում ընկերության շրջանառությունը կազմել է 9.026 մլրդ դոլար, ինչը 32.3 %-ով ավելի է 2010 թ. երկրորդ եռամսյակի համեմատ:
Երեկ մենք տեղեկացրել էինք, որ ներդրողները Google+ սոցցանցի մեկնարկը համարել են բարեհաջող: Սոցցանցի գործարկումից հետո նրա ակցիաներն աճել են 11%-ով: Ներդրողները Google-ի նոր ծրագրի գործարկումը գնահատել են բարեհաջող և ցանկանում են նոր ներդրումներ կատարել ընկերությունում, քանի որ սոցցանցի գոյության ընդամենը երկու շաբաթվա ընթացքում Google-ի կապիտալիզացիան աճել է 20 մլրդ դոլարով, և հիմա նրա գինը շուկայում կազմում է, ընդհանուր առմամբ, 546 մլրդ դոլար: