Грузия Online-ի փոխանցմամբ՝ ԵՄ-ը և Վրաստանը համաձայնագիր են ստորագրել առևտրի ոլորտում աշխարհագրական տեղանունների պաշտպանության շուրջ։ Այդ համաձայնագիրը կողմերին հնարավորություն է ընձեռում ազգային աշխարհագրական տեղանունները կիրառել գյուղմթերքի ու սննդամթերքի անուններում։ Միևնույն ժամանակ դրանց արտահանման ժամանակ պետք է ապահովվեն ԵՄ-ի որակային չափորոշիչները։
Ձեռք բերված պայմանավորվածության համաձայն՝ ներառված են նաև վրացական գինիների 18 անուններ, այդ թվում նաև «Մանավի», «Կինձմարաուլի», «Ախաշենի», «Գուրջաանի», «Ծինանդալի», «Խվանչկարա»։
Նշվում է, որ ներկայիս դրությամբ ԵՄ-ի տարածքում ինտելեկտուալ սեփականության իրավունքով պաշտպանված են ապրանքների մոտ 3000 աշխարհագրական տեղանուններ։
Հիշեցնենք, որ սրանով Վրաստանը դարձավ ԵՄ-ի արևելյան հարևան երկրների թվում առաջին երկիրը, որի հետ ԵՄ-ը կնքել է նմանատիպ համաձայնագիր։