Չնայած 2008թ. մարտի 1-ին սահմանադրական կարգը տապալելու մեղադրանքով անազատության մեջ գտնվող ՀՀ երկրորդ նախագահ Ռոբերտ Քոչարյանի մերձավորներն ու աջակիցները պարբերաբար պնդում են, որ նրան առաջադրված մեղադրանքը «ջուր» է, սակայն տարբեր միջնորդություններով ցայսօր հետաձգում են դատական նիստերը։
Հոկտեմբերի 27-ի գործով Դեմիրճյանների շահերը ներկայացնող փաստաբան Աշոտ Սարգսյանը, հետևելով մամուլի հրապարակումներին, եկել է այն եզրակացության, որ Քոչարյանի աջակիցներին ձեռնտու չէ, որ իրականությունը հանրությանը հասու դառնա դատաքննության ժամանակ։
«Որքան էլ ասում են, որ իրենք շահագրգռված են, որ մեղադրանքը ջախջախելու են, բայց իրենց գործողությունները հակառակն են ապացուցում։ Ինձ թվում է, որ իրենք սպասելիքներ ունեն Մարդու իրավունքների եվրոպական դատարանից և Վենետիկի հանձնաժողովից։ Իրենք սպասելիքներ ունեն, որ ՀՀ Քրեական օրենսգրքի 300․1 հոդվածի վերաբերյալ կարող է լինել այլ դիրքորոշում, որն իրենց համար փրկություն է լինելու։ Դատաքննության փուլում իրենք էլ են հասկանում, որ զորքը բերելու հետ կապված մեղադրանքները հաստատված են։ Միակ հարցը մնում է այն, թե արդյոք զորքը բերելը նշանակո՞ւմ է սահմանադրական կարգի տապալում։ Հիշում եք, չէ՞, որ սկզբում իրենք հայտարարում էին, որ նման բան չի եղել, անգամ մեկ զինվորի չեն բերել։ Բայց այսօր հիմնավորվում է, չէ՞, որ այդ ամենը եղել է։ Նյութերում կան շատ տվյալներ, որ զորքը բերվել է սահմանադրական կարգը տապալելու համար»,- «Առաջին լրատվական»-ի հետ զրույցում ասաց Աշոտ Սարգսյանը։
Փաստաբանը նշեց, որ այն ամենը, ինչ կարդացել է նյութերում` լինի դա Օգանովսկու ցուցմունքը, թե որոշ հրամանատարների ցուցմունքները, ապացուցում են, որ այդ ամենը եղել է։
«Եթե ՄԻԵԴ-ը պարզաբանում ներկայացնի, որ ՀՀ Քրեական օրենսգրքի 300․1 հոդվածը կիրառելի չէ, քանի որ այդ ժամանակ չի գործել, Ռ․Քոչարյանի գործը միանշանակ այդ մասով կարճվելու է»,- ասաց փաստաբանը։
Միաժամանակ Աշոտ Սարգսյանը կարծում է, որ ՄԻԵԴ-ը որոշում կկայացնի, որ այդ հոդվածը կիրառելի չէ։ Նա հիշեցնում է, թե ինչպես Ալեքսանդր Արզումանյանին և մյուսներին վերաբերող նույն հոդվածի կիրառելի լինելու մասով գործը կարճվեց։
«Կարիք չկար, որ դիմեին Սահմանադրական դատարան, որն էլ իր հերթին դիմեց ՄԻԵԴ պարզաբանումներ ստանալու համար։ Այդ հարցը լուծվում է Քրեական դատավարության օրենսգրքի շրջանակներում։ Մամուլում տարածվում է երկու տիպի փաստաթուղթ․ մեկը սահմանադրականության հարցն է, մյուսը՝ կիրառելիության։ Եթե սահմանադրականության հարցն է, ապա այդտեղ ընդհանրապես քննարկելու բան չկա, քանի որ սահմանադրական կարգի տապալումը քրեական պատասխանատվություն է նախատեսում։ Իսկ եթե կիրառելիության հարցին է վերաբերում, ապա կարող են ասել, որ այդպիսի հոդված չի եղել, այդպիսի մեղադրանք չի կարող առաջադրվել, Քրեական օրենսգիրքը չի նախատեսում պատասխանատվություն»,- ասաց փաստաբանը։
