Հայաստանի նորանշանակ վարչապետ Հովիկ Աբրահամյանը միացավ ապրիլի 18-ին ՀՀ նախագահական նստավայրի դիմաց «Դեմ եմ» նախաձեռնության կազմակերպած ակցիայի մասնակիցներին:
«Մեր քննարկումները չպետք է լինեն փողոցում, պատրաստ եմ գործնական քննարկումներ սկսել: Մեր մոտեցումները, նաև ձեր առաջարկների մասով, պարզ են. առաջին քայլն իրականացրել եմ: Կարող եք վստահել, հավատալ, որ մենք կարող ենք ունենալ հաջողություն միասին քննարկումների արդյունքում: Յուրաքանչյուր արդարացի հարցի, որ բարձրացվում է, փորձելու ենք լուծում տալ: Ես առաջարկում եմ ձևաչափ, մենք ստեղծել ենք խումբ, որ աշխատում է: Ձեր բոլոր մտահոգությունների պատասխանները կարող եք ստանալ»,- ասաց նա՝ նշելով, որ հնարավորություն կտրվի չսպասել մինչև սեպտեմբերի 30-ը, այլ մեկ ամսից փոքր-ինչ ավել ժամանակահատվածում՝ մինչև հունիս, ունենալ որոշում, որն ընդունելի կլինի բոլորի կողմից:
Մասնակիցներն, արձագանքելով նրա ելույթին, սկսեցին բարձր գոչել՝ «հի-մա, հի – մա»:
Ի պատասխան՝ Աբրահամյանը նշեց, որ նրանց դիրքորոշումը կառտուցողական չէ, և ինքն ուղղակի ուզում է, որ նրանք ընկալումով մոտենան: «Ես ուզում եմ ձևակերպել իմ մոտեցումը հստակ և անկեղծ, պատրաստ եմ քննարկելու: Առաջին քայլը կատարել եմ, խնդրում եմ հնարավորություն՝ Ձեզ հետ երկխոսություն սկսելու»,- ասաց նա:
«Դ!եմ եմ» շարժման անդամ, քաղաքագետ Դավիթ Մանուկյանը, դիմելով վարչապետին, պահանջեց սպառիչ պատասխան՝ արդյոք մինչև նոր փաթեթի մշակումը մարդու կամքին հակառակ գանձումների կասեցումն ապահովելու է: «Պատասխանեք՝ այո կամ ոչ»,- ասաց նա:
«Դուք փաստի առաջ եք ուզում կանգնեցնել, ես նորից եմ ասում՝ որևէ ապօրինի քայլ չի եղել և չի լինելու: Ես պատրաստ եմ, դա փողոցի քննարկման առարկա չի, գնանք, միասին քննարկենք: Ձևական որևէ բան չեմ ուզում ասել: Խնդրում եմ ուլտիմատումով չխոսել, Ձեզ հարգելով՝ եկել եմ այստեղ, խնդրում եմ լսել, հնարավորություն տալ, կառուցողական ուզում եմ աշխատել»,- ասաց նա՝ հավելելով, որ որևէ կառավարություն կամ անհատ իրավունք չունի հակասահմանադրական քայլ կատարելու:
Վարչապետն ակցիայի մասնակիցներին առաջարկեց վաղն առավոտյան ձևակերպել իրենց հարցադրումները՝ չնայած տեղյակ է դրանց, ապա առաջարկեց հինգ- տասը հոգով գալ, որ քննարկեն: Նրա խոսքով՝ փաստ է, որ գնալու են զիջումների, քայլեր են իրականցնելու: «Դուք ազնիվ չեք, որ հիմա փորձում եք ինձնից փողոցում ինչ-որ պատասխան ստանալ, դա կոռեկտ չի: Ես ձեզանից մեկն եմ, խնդրում եմ՝ վստահեք ինձ»,- ասաց նա՝ նկատելով՝ քայլիկներից է սկսվում ամեն ինչ: Աբրահամյանը խոստացավ. մինչև ԱԺ ապրիլի 28-ի քառօրյան այս հարցում դրական առաջընթաց կլինի: