Ադրբեջանական Salam News գործակալության փոխանցմամբ՝ Թուրքիայի արտգործնախարար Ահմեդ Դավութօղլուն Ստամբուլում հանդիպում է ունեցել ՆԱՏՕ-ի գլխավոր քարտուղար Անդերս Ֆոգ Ռասմուսենի հետ։ Հանդիպումը տևել է մոտ 2.5 ժամ, հանդիպման ժամանակ քննարկման գլխավոր առարկա է հանդիսացել Լիբիայում տիրող իրավիճակը։
Դավութօղլուն Ռասմուսենին իրազեկել է օրեր առաջ Բենղազի կատարած իր այցի մանրամասների մասին։ Հանդիպման ընթացքում կողմերը քննարկել են կարճատև ժամկետում խնդրի լուծման հեռանկարները։
Հիշեցնենք, որ ավելի վաղ նշվում էր, թե Անկարան Բրյուսելին զգուշացրել է մուսուլմանների համար սրբազան համարվող Ռամադան ամսին Լիբիայում ռազմական գործողությունների իրականացման անցանկալիության մասին.
«Ռամադան ամսին օպերացիաների շարունակումը կարող է հանգեցնել Քադաֆիի պրոպագանդիստական կոչերին։ Օրինակ՝ «Խաչակիրները սուրբ օրերին սպանում են մուսուլմաններին»։ Ռամադան ամսին օպերացիաների շարունակումը կարող է հանգեցնել մուսուլմանական աշխարհի դժգոհությանը»։