Հայաստանում Ռուսաստանի դեսպան Սերգեյ Կոպիրկինը, անդրադառնալով Գարեգին Նժդեհի թեմային, ասել է, որ դա մեր ընդհանուր պատմության մի մասն է: «Այս հարցերը շատ նուրբ են: Տեսնում ենք, որ քաղաքական ու միջազգային համատեքստում պատմությունը խմբագրելու, տեղի ունեցածը վերաորակավորելու փորձեր են արվում»,- հայտարարել է դեսպանը:
Կոպիրկինի հայտարարությունից այնքան էլ չի հասկացվում, թե ովքեր են պատմությունը վերաորակավորելու փորձեր անում: Միևնույն ժամանակ Ռուսաստանում Երկրորդ համաշխարհային և Հայրենական պատերազմի պատճառ դարձած Մոլոտով- Ռիբենտրոպ պակտը հայտարարվում է ռուսական դիվանագիտության նվաճում: Հիմա հարց է առաջանում՝ նախկինում Ռուսաստանում դատապարտվող պակտի արդարացումը համարվո՞ւմ է պատմության վերաորակավորում:
Թեմայի շուրջ «Առաջին լրատվական»-ի հետ քննարկմանն իրենց դիտարկումները ներկայացրին Գերագույն խորհրդի նախկին պատգամավոր Ազատ Արշակյանը, Հայ կառուցողական կուսակցության նախագահ Անդրիաս Ղուկասյանը և «Իմ քայլը» խմբակցության պատգամավոր Վիկտոր Ենգիբարյանը:
Քննարկման մասնակիցների դիտարկմամբ՝ Ռուսաստանի դեսպանը մեղմում է Նժդեհի թեման, որը վերջին շրջանում թեժացել էր:
«Ես չեմ կարծում, որ դա դեսպանի ինքնագործունեությունն է, այդպիսի հայտարարություններ անելու համար դեսպանն անպայման պետք է սանկցիա ունենա արտաքին գործերի նախարարությունից: Ընդհանրապես հիմա Ռուսաստանում որոշ բաներ վերանայվում են»,- նշեց Ազատ Արշակյանը:
«Այս հայտարարությունները հավանաբար մեր լսարանի համար են արվում, որպեսզի մեղմացվի այն կրակը, որը փորձում են բորբոքել Ռ. Քոչարյանի կողմնակիցները՝ դիտարկելով իբրև մեծ հակասություն հայ-ռուսական հարաբերություններում,- նշեց Անդրիաս Ղուկասյանը:- Մոսկվան բոնուսներ է տալիս Հայաստանի այսօրվա իշխանությանը…»:
Վիկտոր Ենգիբարյանի կարծիքով՝ ՌԴ դեսպանի հայտարարությունը մի կողմից մեսիջ էր, որ Նժդեհի վերաբերյալ ըմբռնում կա ՌԴ պաշտոնական շրջանակներում, և դրա հետ կապված որևէ անհանգստություն չկա, մյուս կողմից՝ էլ մեսիջ էր՝ ուղղված Բաքվին. «Մոսկվան Բաքվին հասկացրեց՝ պետք չէ պղտոր ջրում ձուկ որսալ»:
Մանրամասն՝ տեսանյութում:
