Հայաստանում արտերկրից ֆինանսավորվող քաղաքական ուժերի առկայության մասին ԱԱԾ նախկին պետ Արթուր Վանեցյանի հայտարարությանը հանրությունն արձագանքել է բավականին բուռն: Խորհրդարանում ներկայացված երեք քաղաքական ուժերն, օրինակ, հայտարարել են, թե չունեն արտաքին ֆինանսավորում: Վանեցյանը հայտարարել է, որ արտաքին ֆինանսավորում ունեցող ուժերը, այսպես ասած, հեղափոխության ճամբարում են: Թե հատկապես որոնք են այդ ուժերը՝ նա չի նշել:
Նրան հակադարձում են տրամաբանական հարցադրումով՝ ինչու, լինելով ԱԱԾ պետ, Արթուր Վանեցյանը չի ձեռնարկել քայլեր այդ ուժերին հայտնաբերելու կամ կապերը բացահայտելու, հանրությանը ներկայացնելու, պատասխանատվության ենթարկելու համար, եթե այդ ֆինանսավորման առումով խոսքը հակաօրինական և հակաիրավական մեխանիզմի մասին է:
Այստեղ, սակայն, խնդիրը դառնում է թերևս բարդ ու բազմաշերտ, եթե դրան ավելացնենք նաև այն, որ Հայաստանում այդօրինակ հարցի, խնդրի, ազգային անվտանգության սպառնալիքի մասին դեռևս ամիսներ առաջ բարձրաձայնել է վարչապետ Նիկոլ Փաշինյանը՝ խոսելով հայաստանյան ներքին քաղաքական կյանքում օտարերկրյա գործակալների առկայությունը բացառելու մասին, որ չպետք է լինեն այդպիսիք: Այսինքն՝ մեծ հաշվով, հարցը, որ բարձրացնում է ԱԱԾ նախկին պետը, առաջինը բարձրացրել է վարչապետ Նիկոլ Փաշինյանը: Եվ այդ իմաստով խնդրի վերաբերյալ հանրային գնահատականների և դատողությունների տեսանկյունից հարցադրումները թերևս արժե հստակեցնել և, այսպես ասած, «զտել» քաղաքական կոնյունկտուրայից:
Արթուր Վանեցյանը խնդրին գուցե անդրադառնում է իր քաղաքական հաշիվներից ելնելով, դա իր գործն է, և եթե դրանում կան խնդիրներ օրենքի հետ, ապա պետք է զբաղվեն իրավապահները: Այստեղ, սակայն, հանրությունը պետք է վեր կանգնի քաղաքական կոնյունկտուրային մակարդակից, ինչը նշանակում է, որ պետք է հստակեցվի ոչ միայն ԱԱԾ նախկին պետի, այլև վարչապետի՝ նախկինում արած հայտարարությունների հանգամանքը:
Ի վերջո՝ կա՞ ներքաղաքական կյանքում օտարերկրյա գործակալների խնդիր, թե՞ ոչ: Հարցը դաշտ է բերել վարչապետը, հետևաբար դրանից բխող հարցերն էլ պետք է ուղղված լինեն քաղաքական բարձր ղեկավարությանը: Այդ ղեկավարությունն այսօր կարո՞ղ է հավաստիացնել Հայաստանի հանրությանը, որ չկան, այսպես ասած, քաղաքական գործակալ ուժեր կամ գործիչներ, որոնք ստանում են արտաքին ֆինանսավորում և ըստ այդմ՝ Հայաստանում արտաքին պատվեր սպասարկում:
Օրերս Հայաստանի վարչապետը հայտարարեց ԱԱԾ-ին տված հանձնարարականի մասին՝ «սատանային» հայտնաբերելու ուղղությամբ: Իսկ եղե՞լ է, կա՞ գործակալներին հայտնաբերելու ուղղությամբ հանձնարարական, և ի՞նչ կարող է զեկուցել ԱԱԾ պետը վարչապետին այդ թեմայով, իսկ վարչապետն էլ ի՞նչ կարող է փոխանցել հանրությանը այդ զեկույցից հետո:
