«Որևէ միավորի կողմից դեռ չի գտնվել բանաձևված այն խնդիրը, թե ինչ ասել է ներքին հանրային միասնականություն: Իմ խորին համոզմամբ՝ այդ միասնականության, լեգիտիմության մանդատը տրվում է քաղաքական ուժին ընտրությունների միջոցով: Այս իշխանությանը տրվել է համապատասխան մանդատ լեգիտիմ գործունեություն իրականացնելու համար: Հետևաբար, թե ազգային միասնության, ներքին համերաշխության ինչպիսի մթնոլորտի մասին է խոսքը՝ ամեն մի քաղաքական ուժ կամ գործիչ, կարծում եմ, ինքն է իր պատկերացումների շրջանակում բերում հրապարակ»,- անդրադառնալով «Վերնատուն» ակումբի հայտարարությանը՝ «Առաջին լրատվական»-ի հետ զրույցում ասաց փաստաբան Նորայր Նորիկյանը:
Մեր զրուցակիցը կարևորեց, թե ովքեր են այդ գաղափարները ներկայացնում, ովքեր են այդ գաղափարների առաջամարտիկները. ««Վերնատան» մասնակիցների ցանկը հնարավորություն է տալիս արձանագրելու, որ մենք գործ ունենք քաղաքական լուսանցքում հայտնված և քաղաքական կենսագրությունը ըստ էության ավարտած անձանց հետ, ովքեր փորձ են անում վերակենդանանալ կամ վերակենդանացնել ինչ-որ քաղաքական դիակների, որոնք չեն համակերպվում Հայաստանում ստեղծված իրավիճակի հետ»:
Նորայր Նորիկյանը չի կարծում՝ որ այս քաղաքական ակումբը կարող է քաղաքական հեռանկար ունենալ, քանի որ նախ՝ ապագան նոր քաղաքական ուժերինն է, նոր քաղաքական անհատներինն ու քաղաքական առաջնորդներինը. «Եվ ես ձեզ վստահեցնում եմ, որ այդ նոր քաղաքական ուժերը կամ քաղաքական անհատներն ու առաջնորդները ճիշտ ժամանակին իրենց քաղաքական հայտը կներկայացնեն և ամբողջ քաղաքական դաշտը կբերեն հավասարակշռման, որովհետև օբյեկտիվորեն այսօր մեր քաղաքական համակարգը խախտված է՝ ունենք օրինական ընտրությունների միջոցով ձևավորված լեգիտիմ իշխանություն, բայց, ցավոք սրտի, դեռևս չունենք այդ իշխանությանը զսպող, հավասարակշռող իրական քաղաքական այլընտրանք»:
Նրա խոսքով՝ հիմա անցյալից քրքրել-բերել են մարդկանց, որոնց քաղաքական կենսագրությունը բոլորին քաջ հայտնի է. «Այդ քաղաքական ակումբի հետագա գործունեությունը որևէ հող չունի հանրային գիտակցության մեջ: Ուստի ես կարծում եմ՝ սրանք փորձեր են գործող իշխանությանը այլընտրանք ձևավորելու, բայց այդ փորձերը ավարտվելու են ձախողմամբ»:
Հարցազրույցն ամբողջությամբ՝ տեսանյութում:
