Արժույթի միջազգային հիմնադրամի կանխատեսումների համաձայն՝ 2019թ-ի տարեվերջին Հայաստանն ունենալու է 7 տոկոս տնտեսական աճ։ Մինչդեռ, նշենք, որ դեռևս այս տարվա ապրիլ ամսին ըստ միջազգային ֆինանսական կառույցների և այդ թվում նույն Արժույթի միջազգային հիմնադրամի կանխատեսումների՝ 2019 թվականին Հայաստանի տնտեսական աճը լինելու էր 4․5-ից 5 տոկոսի շրջակայքում։
Արժույթի միջազգային հիմնադրամի հայաստանյան ներկայացուցիչ Յուլյա Ուստյուգովան օրերս հայաստանյան ԶԼՄ-ներից մեկին տված հարցազրույցում անդրադարձել էր այս հարցին և նշել, որ իրենք վերանայել են իրենց կանխատեսումները և հիմա Հայաստանը սպասվածից ավելի բարձր ցուցանիշներ է արձանագրելու, որը հիմնականում պայմանավորված է մասնավոր սպառումով, մինչդեռ Ուստյուգովայի գնահատմամբ՝ երկարաժամկետ և կայուն զարգացման տեսանկյունից՝ շատ ավելի լավ կլիներ, որ տնտեսական աճը հիմնվեր ներդրումների և արտահանման վրա։
Թեմայի վերաբերյալ «Առաջին լրատվական»-ը զրուցեց Գործատուների հանրապետական միության նախագահ Գագիկ Մակարյանի հետ։
«Ներկայիս տնտեսական աճը հիմնականում պայմանավորված է հատկապես փոքր ու միջին ձեռնարկությունների որոշակի աշխուժացմամբ, որոնց մեծամասնությունը այո´, առևտրային ձեռնարկություններ են, իսկ այս ՓՄՁ-ների աշխուժացումն էլ իր հերթին կապված է Հայաստանում տուրիզմի զարգացմամբ․ եթե նախկինում Հայաստանում տուրիզմը սեզոնային բնույթ էր կրում և տարվա մեջ ընդամենը մի քանի ամիս էր, որ տուրիստական մեծ հոսքեր կային, ապա այս վերջին 1-2 տարվա ընթացքում դա գրեթե հավասարաչափ է բաշխվել և ներկա դրությամբ կարելի է ասել, որ գրեթե ամբողջ տարվա կտրվածքով՝ տուրիզմը բավականին մեծ թափ է հավաքում Հայաստանում։
Տնտեսական աճի հաջորդ գործոններից մեկն էլ հայրենադարձության որոշակի միտումներն են, չնայած հիմա էլ միգրացիան շարունակվում է, բայց, այսուհանդերձ, վերադառնալու հետ մեկտեղ մարդկանց մոտ որոշ չափով նաև գնողունակության բարձրացում է նկատվում։
Այս ամենից զատ, կառավարության կողմից մարզային կյանքն աշխուժացնելու քայլերը, բնականաբար, նույնպես ունեցել են իրենց ազդեցությունը»,- ընդգծեց մեր զրուցակիցը։
Մանրամասները՝ տեսանյութում։
