«Կառավարությունը նախատեսում է 401 մլն դրամ հատկացնել Կարեն Դեմիրճյանի անվան մարզահամերգային համալիրին անհրաժեշտ գույք ձեռք բերելու նպատակով: Այդ գումարով նախատեսվում է գնել լուսադիոդային լուսատուներ, սահադաշտի վերազինման համար սարքերի ու սարքավորումներ, ինչպես նաև ձեռք բերել երաժշտական գործիք՝ ռոյալ: «Առաջին լրատվական»- ի հետ զրույցում ռեժիսոր, «Ոսկե ծիրանի» հիմնադիր Հարություն Խաչատրյանը նշեց, որ դա ո՛չ նվեր է, ո՛չ շքեղություն, այլ ներդրում է, որն օգուտ կբերի: «Եթե այսօր վախենանք, ներդրումներ չանենք, մենք շատ բան կսպանենք, շատ բաներ կան, որ կվերանան և հետագայում չենք կարողանա վերակառուցել: Կարծում եմ՝ լուրջ կառավարման արդյունքում այդ փողերը հետագայում հետ կբերվեն»:
Ո՞րն է պետության դերը մշակույթի զարգացման գործում: Կա տեսակետ, որ արվեստն ինքը պետք է իր համար ճանապարհ հարթի, մեկ այլ տեսակետի համաձայն՝ առանց պետական աջակցության բարձր արվեստը չի կարող գոյատևել: Հարություն Խաչատրյանի կարծիքով՝ լուծումները տարբեր են, կառավարությունը պետք է որոշի, թե արդյոք ինչ է անհրաժեշտ մշակութային գործիքներն օգտագործելու և՛ ներքին, և՛ արտաքին լսարանի համար:
«Օրինակ՝ կինոն լավագույն «զենքերից» մեկն է երկրի մշակութը ներկայացնելու համար: Դեռևս չկան այն ռեժիսորները և պրոդյուսերները որոնք կարող են միջազգային ֆոնդերից գումարներ բերել: Պետությունը բավականին փոքր գումար է տրամադրում կինոյին… Կինոն շատ կարևոր զենք է Հայաստանի համար, ինչպես «Միգ» ինքնաթիռները: Մենք ունենք լավագույն ֆիլմեր, որոնք ոչնչով չեն զիջում ամերիկյան կամ ֆրանսիական ֆիլմերին»,- նշեց մեր զրուցակիցը՝ հավելելով, որ անհրաժեշտ է ռեվիզիա անել և վերականգնել մեր ունեցած հայկական ոսկե կինոֆոնդը:
Ռեժիսորը նաև իր մտահոգությունն արտահայտեց այն խնդրի վերաբերյալ, որ Հայաստանում չկա կինոքննադատների ինստիտուտ. «Ոչ ոք չի ասում՝ այս աղբն ինչու ես նկարել»:
Մանրամասն՝ տեսանյութում: