ԱՄՆ իշխանություններն ապասառեցրել են Իրանի ակտիվների ևս մի մաս՝ կապված Թեհրանի կողմից «վեցյակի» հետ ձեռք բերված համաձայնագրի հերթական պայմանի կատարման հետ: Այս մասին լրագրողներին ճեպազրույցի ժամանակ հայտնել է Պետդեպի պաշտոնական ներկայացուցիչ Մարի Հարֆը՝ փոխանցում է ITAR-TASS-ը:
Ինչպես հստակեցրել է նա՝ ապաարգելափակվել են 450 մլն դոլարի չափով ակտիվներ:
Հարֆի խոսքով՝ իրենք տեսել են ԱԷՄԳ-ի գլխավոր տնօրենի հաշվետվությունը կազմակերպության կառավարիչների խորհրդին, որում հաստատվում է, որ Իրանը լիովին վերջացրել է մինչև 20 տոկոս հարստացված ուրանի համաձայնեցված ծավալի՝ հարստացման մակարդակի նվազեցման աշխատանքները:
Ինչպես հունվարին հայտարարել էր ԱՄՆ պետքարտուղար Ջոն Քերին, գործողությունների համատեղ ծրագրի իրականացումը թույլ կտա Իրանին հասանելիություն ստանալ 4.2 մլրդ դոլարին, որը նախկինում սառեցվել էր արտասահմանյան հաշիվներում: Փետրվարի սկզբին Իրանը հասանելիություն էր ստացել այդ միջոցներից 550 մլն դոլարին:
