Տնտեսական համագործակցության և զարգացման կազմակերպության զեկույցի համաձայն՝ 2009 թվականին Ռուսաստանի քաղաքացիություն է ստացել ավելի քան 54,800 հայ` զբաղեցրել երկրորդ տեղը Ռուսաստանի Դաշնությունում քաղաքացիություն ստացող բազմազգ ազգությունների շարքում։
«Այս տվյալները մեկ անգամ ևս փաստում են մեր գնահատականներն այն մասին, որ Հայաստանում իշխանությունների կողմից իրականացվում է Սպիտակ ցեղասպանություն։ Դա պարզապես կարելի է գնահատել «Հայաստանն առանց հայերի» քաղաքականությանը նպաստող գործունեություն»,- «Առաջին լրատվականի» հետ զրույցում ասաց «Ժողովրդի իշխանություն» հասարակական-քաղաքական նախաձեռնության համակարգող խորհրդի անդամ Մովսես Արիստակեսյանը։
Ըստ նրա՝ հայաստանյան իշխանությունները քայլեր չեն ձեռնարկում արտագաղթի նվազեցման ուղղությամբ, ինչը վկայում է, որ «իշխանությունները սպառել են իրենց և իրենց կոչումն է օլիգարխների գերհարստացմանը նպաստելն ու Հայաստանը հայաթափելը»։
Վերլուծելով Հայաստանում անձի համար սահմանված նվազագույն աշխատավարձի՝ (32 հազ. դրամ), նվազագույն պարենային զամբյուղի (37 հազ. դրամ) և նվազագույն սպառողական զամբյուղի (63 հազ. դրամ) պաշտոնական ցուցանիշները՝ Մ.Արիստակեսյանը նշեց, որ ըստ միջազգային չափանիշների, ապահով համարվելու համար, Հայաստանի ներկա սոցիալ-տնտեսական պայմաններում, անձը պետք է ստանա շուրջ 250 հազ.դրամ եկամուտ, ինչը մարդուն նորմալ կենսապայմաններ ապահովելու նվազագույն արժեքն է։ Դա էլ այն դեպքում, երբ 4-հոգանոց ընտանիքում առնվազն երկուսը զբաղված են։
Թե ինչ ազդեցություն կարող է ունենալ ահագնացող արտագաղթը Հայաստանի բնակչության ժողովրդագրական աճի վրա, Մ.Արիստակեսյանը նշեց, որ այդ առումով ծանր վիճակ է. Մենք գիտեինք և սովոր էինք այն փաստին, որ հայկական միջին ընտանիքը բաղկացած է 4.1 անձից։ Սակայն, ըստ անկախ փորձագետների գնահատակնների՝ այսօր հայկական ընտանիքը բաղկացած է 3.6 անձից, ընդ որում, երեխաների թիվը 1.6 է, այսինքն՝ չի ապահովվում ընտանիքի նորմալ վերարտադրությունը։
«Այս պարագայում, բացի էմիգրացիոն միտումներից (երբ երկիրը դատարկվում է), սպասվում է բնական աճի դանդաղեցում։ Դրա արդյունքում ժողովուրդը կծերանա, կարագանան մահացության տեմպերը»,- մտահոգված ասաց մասնագետը՝ շեշտելով, որ դա իր հետադարձ ազդեցությունը կունենա երկրի տնտեսական զարգացման հեռանկարի վրա, քանզի ժողովրդագրական վիճակի վատթարացման արդյունքում կրճտվում է աշխատունակ մարդկանց թիվը։ Այսպիսի իրավիճակի գլխովոր պատճառներից ըստ մասնագետի նաև այն է, որ պետությունը չունի որևէ ռազմավարական ծրագիր՝ կապված տնտեսության զարգացման հետ։
«Հետևաբար, գործող իշխանույթունների կողմից տնտեսական աճ ապահովելու հեռանկարը, հաշվի առնելով շրջափակումը, բավական մռայլ է: Այստեղից էլ հետևում է իշխանության ղեկից նրանց շութափույթ հեռացման անհրաժեշտությունը»,- խոսքը եզրափակեց Մ.Արիստակեսյանը։
