Մեր քաղաքական թիմը մի պահ գուցե թյուրըմբռնում է ունեցել «Էլարդի» զեկույցի մեկնաբանության հարցի շուրջ, բայց երբևէ թիմը որոշում չի ունեցել, որ Ամուլսարի հանքը բացում է: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Մարիա Կարապետյանը:
Նրա խոսքով, իրենք միշտ այս խնդիրը ձևակերպել են որպես ժառանգված խնդիր. «Թույլտվությունը նախկինում է տրված և մենք գործ ունենք դրա հետևանքների հետ: Այսինքն պիտակավորել Ջերմուկ մեկնած պատգամավորների խմբին որպես հանքին դեմ կամ կողմ, նման հարց մեր առջև դրված չէ: Մեր բանաձևը միշտ եղել է «եթե.. ապա»-ներով, ինչպես վարչապետն է ձևակերպել: Իսկ «Էլարդի» զեկույցից հետո նաև այդ ողջ գործընթացի թափանցիկ լինելու արդյունքում նաև մեր ներքին գործընթացները հանրությանը երևացնեն, որտեղ ես ոչ մի վատ բան չեմ տեսնում»,-ընդգծեց նա:
Պատգամավորը նշեց, որ իրենք արդեն երկու անգամ հանդիպել են Ամուլսարի ճանապարհը փակած անձանց հետ, նաև այլ խմբերի հետ:
