Արմավիրի մարզի ընդհանուր իրավասության դատարանում Վահե Խալաթյանի նախագահությամբ սկսվում է Նժդեհ Ենոքյանի և Ցոլակ Ենոքյանի գործի դատական քննությունը:
Ըստ մեղադրանքի՝ նախկինում դատված 21-ամյա Նժդեհը 2013 թվականի նոյեմբերի 14-ին, ժամը 14-ն անց 30-ի սահմաններում վրեժի հողի վրա համագյուղացի Արմեն Եփրեմյանին սպանելու դիտավորությամբ Արմավիրի մարզի Սարդարապատ գյուղում «ՎԱԶ-2107» ավտոմեքենայի պատուհանից ողորկափող որսորդական հրացանով կրակել է Եփրեմյանի կրծքավանադակի հետին շրջանին, որից Եփրեմյանը մահացել է:
Նժդեհ Ենոքյանը մեղադրվում է դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Հանցագործության գործիքը՝ ողորկափող որսորդական հրացանը, պատկանել է Նժդեհի բարեկամ Ցոլակ Էվրիկայի Ենոքյանին:
Վերջինս նույնպես ամբաստանյալի աթոռին է:
Նա մեղադրվում է այն բանի համար, որ իր անվամբ գրանցված որսորդական հրացանի պահպանության կանոնները խախտելով՝ ՌԴ մեկնելու կապակցությամբ հրացանը 2013 թվականի ապրիլին հանձնել է իր ազգական Հովհաննես Ենոքյանին, որով պայմաններ է ստեղծել այլ անձի կողմից նշված հրացանի օգտագործման համար: Դա առաջացրել է ծանր հետևանքներ:
Հովհաննես Ենոքյանի որդի Նժդեհը իրենց տան մետաղական պահարանից վերցրել է Ցոլակի հրացանը և սպանել է Արմեն Եփրեմյանին:
46-ամյա Ցոլակ Ենոքյանը մեղադրվում է ՀՀ քրեական օրենսգրքի 239 հոդվածով:
Նժդեհ Ենոքյանը կալանքի տակ է, իսկ Ցոլակ Ենոքյանի խափանման միջոցը գրավն է:
