Ուկրաինայի շուրջ ստեղծված իրավիճակում Ռուսաստանի նախագահ Վլադիմիր Պուտինը գործում է, մինչդեռ ԱՄՆ նախագահ Բարաք Օբաման հոգեվարքի մեջ է, գրում է The Wall Street Journal-ը:
«Մենք գիտենք, որ պարոն Օբաման նախագահի պաշտոնում առաջադրվել է ոչ նրա համար, որ մասնակցի մեծ տերությունների քաղաքականությանը, սակայն դա դեռևս նրա պաշտոնեական պարտականություններից մեկն է»,- ասված է հոդվածում:
Պարբերականը հարցնում է՝ արդյոք Օբաման նախկինի նման հետաքրքրվա՞ծ է իր աշխատանքով, և ավելացնում է, որ, միաժամանակ, Կիևը հասկացել է, որ Ուկրաինան ինքը պետք է իր հոգսերը հոգա:
Իր հերթին, Chicago Tribune-ը գրում է, որ Արևմուտքին անհրաժեշտ է ակտիվանալ: Ըստ թերթի՝ մասնավորապես, Վաշինգտոնը պետք է Կիևի հետ հետախուզական տվյալներ փոխանակի: Բացի դրանից՝ ԵՄ-ն և ԱՄՆ-ը կարող են խստացնել Ռուսաստանի նկատմամբ պատժամիջոցները, ասվում է հոդվածում:
Համանման կարծիքի է The Los Angeles Times-ը: Ըստ պարբերականի՝ Վաշինգտոնն ու Բրյուսելը պետք է ավելի ակտիվորեն դիմակայեն Մոսկվային:
