Նոյեմբերի 6-ին ընթացակարգային ու կանոնակարգային խախտում թույլ տալով՝ Հայաստանի ֆուտբոլի ֆեդերացիայի նախագահ Արթուր Վանեցյանը Աբրահամ Խաշմանյանին միանձնյա նշանակել է ազգային թիմի գլխավոր մարզիչ, մինչդեռ ըստ կանոնադրության՝ գլխավոր մարզչի նշանակման իրավասությունը պատկանում է բացառապես գործադիր կոմիտեին:
Այս առնչությամբ ԱԺ «Իմ քայլը» խմբակցության պատգամավոր, Հայաստանի ֆուտբոլի ֆեդերացիայի գործադիր կոմիտեի անդամ Արեն Մկրտչյանը «Առաջին լրատվական»-ի հետ զրույցում նշեց, որ իրենք ՀՖՖ պաշտոնական կայքից են իմացել, որ ֆուտբոլի Հայաստանի ազգային հավաքականն արդեն գլխավոր մարզիչ ունի, ինչն անակնկալ է եղել իրենց համար. «Մինչդեռ գլխավոր մարզիչ միայն մենք՝ գործկոմի անդամներս կարող էինք նշանակել»:
Նրա խոսքով՝ բացի հարցի իրավական մասից, կար նաև էթիկայի կողմը. «Եթե անգամ ՀՖՖ նախագահը կարողանար միանձնյա նշանակել ազգային հավաքականի գլխավոր մարզիչ, կարող էր գոնե տեղեկացնել գործկոմի անդամներին»:
«Դրանից հետո, ներողություն, տառավճարով թերթոն աշխատող մի քանի լրատվականներ և տարբեր ֆեյքային որջեր թիրախավորեցին մեզ անձնապես՝ գործկոմի, ինչպես իրենք են սիրում նշել, իմքայլական անդամներին՝ այդ թվում խեղելով գործկոմի փակ նիստի ընթացքը. իբր ինչ-որ «ինֆորմացիոն» արտահոսքեր են կազմակերպել և դրա վրա հենվելով՝ փորձեցին թիրախավորել»,- ասաց Արեն Մկրտչյանը՝ հավելելով, որ եթե իրենք արշավներ կազմակերպեին, դրա հետևանքները շատ արագ կոնկրետ մարդիկ կզգային:
Անդրադառնալով Աբրահամ Խաշմանյանի թեկնածության հաստատմանը գործկոմի կողմից՝ Արեն Մկրտչյանն ասաց, որ նրան չհաստատելու դեպքում Հայաստանի ազգային հավաքականը երկու տեխնիկական պարտություն կկրեր, քանի որ ազգային թիմ չէր ձևավորվի. «Բացի այդ, կարող եմ վստահաբար ասել, որ Աբրահամ Խաշմանյանն այս պահին լավագույն ընտրությունն էր. այս հարցում դիրքորոշումները ակամայից համընկել են: Բայց միևնույն է՝ այս իրավիճակը մենք ընդունում ենք որպես ահազանգ և որպես ի գիտություն, որովհետև նույն հաջողությամբ մենք կարող ենք արթնանալ և տեսնել, որ, օրինակ, Ռուբեն Հայրապետյանն է նշանակվել ֆուտբոլի Հայաստանի ազգային հավաքականի գլխավոր մարզիչ»:
Հարցազրույցն ամբողջությամբ՝ տեսանյութում:
