Հյուսիսային Կորեայի նախագահ Կիմ Չեն Ինը Հյուսիսային Կորեայի ազգային տոնի՝ Կիմ Իր Սենի ծննդյան 102-ամյակի կապակցությամբ այցելել է Կիմսուսանյան պալատ՝ հայտնում է ITAR-TASS-ը:
Նա եղել է սրահներում, որտեղ ամփոփված են նրա պապի՝ հանրապետության հիմնադրի և առաջին նախագահի և հոր՝ Կիմ Չեն Իրի շիրիմները: Հյուսիսային Կորեայի նախագահի անունից պալատում նրանց արձանների մոտ ծաղկեպսակներ են դրվել:
Կիմ Չեն Ինին ուղեկցել են երկրի առաջատար ռազմական գործիչներ:
Պալատ են այցելել նաև Հյուսիսային Կորեա հրավիրված արտասահմանյան պատվիրակություններ ու արտիստներ: Երկիր են ժամանել Ռուսաստանում, Չինաստանում, ԱՄՆ-ում, Կանադայում, Ավստրալիայում, Ճապոնիայում և այլ երկրներում ապրող կորեացիներ:
Օտարերկրացի հյուրերին հրավիրում են այնտեղ կազմակերպվող համերգներին, ցուցահանդեսներին, որտեղ էքսկուրսավարները պատմում են Կիմ Իր Սենի հեղափոխական ներդրումների մասին:
Կիրակի օրը Փխենյանում տոնի կապակցությամբ մոտ 1000 վազորդ ավելի քան 10 երկրից մասնակցել է 27-րդ միջազգային մարաթոնին:
Մայրաքաղաքում տեղի են ունենում հավաքներ ու ելույթներ, որոնց ընթացքում հնչում է «Ապրենք ու պայքարենք կիմ-իր-սենյան ձևով» նշանաբանը:
Կիմ Իր Սենը 1948-1972թթ. զբաղեցրել է նախարարների կաբինետի ղեկավարի պաշտոնը, 1972-ից եղել է երկրի նախագահը: 1994-ին մահվանից հետո նա հայտարարվել է Հյուսիսային Կորեայի «հավերժ նախագահ»:
