Թեհրանը խնդրել է ՄԱԿ-ի՝ ընդունող երկրի հետ հարաբերոթյունների հարցերով կոմիտեին հատուկ հանդիպում անցկացնել՝ կապված իր մշտական ներկայացուցչին այցագիր տրամադրելու հարցում ԱՄՆ-ի մերժման հետ: Այս մասին հայտնում է Reuters գործակալությունը՝ հղում անելով կոմիտեի ղեկավարին:
Անցած ուրբաթ ԱՄՆ-ը մերժել էր այցագիր տրամադրել դիվանագետ Աբու Թալեբիին, ում Իրանը մտադիր է նշանակել ՄԱԿ-ում իր ներկայացուցիչ: Վաշինգտոնն իր դիրքորոշումը պատճառաբանում է նրանով, որ Թալեբին 1979 թվականին եղել է Թեհրանում ԱՄՆ դեսպանատունը զավթած ուսանողական կազմակերպության շարքերում:
Ինչպես հայտարարել է ՄԱԿ-ում Կիպրոսի մշտական ներկայացուցիչ և կոմիտեի ղեկավար Նիկոլաս Էմիլիոն, կոմիտեն կարող է հանդիպումն անցկացնել հաջորդ շաբաթ: «Նրանք (Իրանի իշխանությունները) հստակեցրել են, որ կոմիտեի կողմից որևէ գործողություն չեն պահանջում: Ներկայում նրանք ցանկանում են ծանոթացնել մեզ (առկա իրավիճակին)»,- հավելել է Էմիլիոն:
