Ռոբերտ Քոչարյանի փաստաբանական թիմն արդեն որերորդ անգամ վիրավորական արտահայտություններ է հնչեցնում Մարտի 1-ի գործը քննող դատավոր Աննա Դանիբեկյանի նկատմամբ։
Նախ՝ սեպտեմբերի 20-ի նիստին, երբ դատավորը կրկին մերժեց փոփոխել Ռոբերտ Քոչարյանի խափանման միջոցը, Հայկ Ալումյանը հայտարարեց, որ թե՛ այսօր և թե՛ նախորդ նիստին հրապարակված որոշումները կայացվել են դատարանի նկատմամբ բիրտ, բացահայտ, աննախադեպ ճնշումների ազդեցության տակ, և որ դատարանն այսպիսով դարձել է գործիք Քոչարյանի նկատմամբ քաղաքական հետապնդումների համար։ Հայկ Ալումյանը, հիշեցնելով վարչապետ Նիկոլ Փաշինյանի խոսքերն այն մասին, որ Հայաստանում դատական համակարգում գոյություն ունեն պատերի տակ վնգստացող դատավորներ, և այդ հանգամանքն իր հրապարակային ելույթներից մեկում հաստատել է նաև Բարձրագույն խորհրդի նախագահ Ռուբեն Վարդազարյանը, դիմելով դատավորին՝ Ալումյանը հարցրեց. «Մենք ուզում ենք իմանալ` դուք վնգստացող դատավորների ցանկում կա՞ք, հարգելի՛ դատարան»։
Այսօրվա դատական նիստի ժամանակ էլ, երբ դատավոր Աննա Դանիբեկյանը կրկին մերժեց գրավի դիմաց փոփոխել Ռոբերտ Քոչարյանի խափանման միջոցը, Քոչարյանի մյուս փաստաբան Ռուբեն Սահակյանն է վիրավորական արտահայտություններ հնչեցրել դատավորի հասցեին։ Նախ Սահակյանը հայտարարեց, որ իր կաշվի վրա զգացել է դատավորի մասնագիտական գիտելիքների խոր պակասը, ապա նշել էր, որ առաջիկայում հակված է դատավոր Դանիբեկյանին ինքնաբացարկի միջնորդություն հայտնելու։ «Նա չի տիրապետում իր մասնագիտությանը: Նախորդ նիստում չհասկացավ, թե ինչի մասին եմ խոսում և ասաց՝ «կարճ կապեք»… եթե չես հասկանում, ինչո՞ւ կարճ կապեմ, գնա ձեր տուն, կատուներին դատապարտի: Քո կատուների գործը լսի, ոչ թե մարդկանց… դե, նա շատ կատուներ է պահում»,- ասել է Փաստաբանների պալատի նախկին նախագահը։
Նա նաև որոշ վիրավորական արտահայտություններ է թույլ տվել նաև քննիչների նկատմամբ։ Անդրադառնալով առաջադրված մեղադրանքին, Ռուբեն Սահակյանը, դիմելով քննիչներին, ասել է. «Այ… ողորմելիներ, որ ասեմ, կոպիտ կլինի… այ եսիմինչեր, դուք քննիչներ եք, դու քննչական խմբի ղեկավա՞ր ես, Հրաչյա Մուշեղյան, բա չգիտե՞ս, որ երբ մարդուն մեղադրում ես ՍԴ անդամների վրա ճնշում գործադրելու համար, ուրեմն պետք է նման ցուցմունք ունենաս: ՍԴ ութ դատավորից միայն մեկին են հարցաքննել, որն ասել է, թե իր հանդեպ ճնշում չի եղել: Բա ինչո՞ւ եք գրել մեղադրանքում, թե ճնշում է գործադրվել»:
Փաստաբանների պալատն առ այսօր չի արձագանքել Քոչարյանի փաստաբանների կողմից թույլ տված այս վիրավորանքներին։ Ինչպես սեպտեմբերի 20-ի նիստից հետո, այնպես էլ այսօր քար լռություն էր Ստամբուլյան կոնվենցիայի վտանգներով տառապող Փաստաբանների պալատի նախագահի կողմից։ Մինչդեռ նախորդ իշխանության ժամանակ նույն Պալատը, Պալատի նախագահ Արա Զոհրաբյանը խոշորացույցով կարդում էր այդ ժամանակ ընդդիմադիր կեցվածքով փաստաբանների գրառումները և չեղած տեղից կարգապահական վարույթներ էր հարուցում։ Ներկայումս, երբ իսկապես կա դրա անհրաժեշտությունը, Պալատում լռություն է տիրում։
«Առաջին լրատվական»-ը փորձեց պարզաբանում ստանալ Փաստաբանների պալատից, մասնավորապես՝ չե՞ն պատրաստվում կարգապահական վարույթներ հարուցել այս փաստաբանների հետ կապված։ Պալատի մամուլի խոսնակ Հայկ Հակոբյանն ասաց, որ ՓՊ նախագահը գտնվում է գործուղման մեջ, հետևաբար այդ հարցը չի քննարկվել։
Իրավապաշտպան Ժաննա Ալեքսանյանն «Առաջին լրատվական»-ի հետ զրույցում ասաց, որ փաստաբանների այդ վարքագիծն ավելի շատ վնասում է իրենց պաշտպանյալին՝ Ռոբերտ Քոչարյանին։ «Նման հայտարարությունները, բնականաբար, չեն նսեմացնում դատավորին։ Կատու պահելը նսեմացուցիչ արարք չէ։ Ես երեկ տեսա, որ հանրությունն արդեն ծաղրում էր նման արտահայտություն անելը»,- ասաց Ալեքսանյանը՝ ավելացնելով. «Իսկ ընդհանուր առմամբ, Փաստաբանների պալատը երբեք ադեկվատ չի արձագանքել որևէ դեպքի։ Երբ պետք է, իրենք չեն միջամտում, իսկ երբեմն հայտնվում են ինչ-որ անկապ թեմաներում և անհասկանալի գործելակերպ են դրսևորում։ Մինչդեռ, ցանկացած իրադարձության, միջադեպի վերաբերյալ պետք է լինի պատշաճ արձագանք»։