«Մենք անգամ քաղաքացիական դաշտով չենք կարողանալու մեր հարևանների հետ շփվել, քանի որ մեր լեզուները և մեր մարտահրավերները տարբեր են լինելու. նրանք ձգտելու են էլ ավելի դեմոկտարիայի, մենք ձգտելու ենք գոնե մի փոքր ազատագրման, և դա մեզ ամենևին հավասար պայմանների մեջ չի դնում մեր հարևանների հետ»,- «Առաջին լրատվական»-ի հետ զրույցում ասաց հրապարակախոս Զարուհի Հովհաննիսյանը:
Ըստ նրա՝ այն բոլոր քաղաքացիական խմբերը, որոնք անցել են մի քանի տարվա պայքար, հասկացել են, որ լուծումը լինելու է համախմբման միջոցով, ամեն մեկը իր խնդիրը խնդրականացնելով որևէ լուծման չի հասնելու, որովհետև իրավիճակը բավական սուր է և բազմակողմանի:
«Մենք արդեն գիտակցել ենք, որ պետք է գնանք մեկ այլ փուլի, պետք է բարձրանանք ընդհանուր եզրեր գտնելու և բոլոր քաղաքացիական շարժումները մեկ պլատֆորմի վրա ներկայացված լինելու և մեկ ցանցային համակարգում դիտարկելու տեսանկյունից»,- ասաց Զարուհի Հովհաննիսյանը՝ հավելելով, որ այսօր «Դեմ եմ» շարժումը հասունացած է, քանի որ այն հենվել է բազում տարիների քաղաքացիական տարբեր շարժումների փորձի վրա և կարողացել է այդ էնեգետիկայի շնորհիվ ստեղծել էլ ավելի մեծ հանրայի հնչեղություն:
Նա նշեց, որ սա բավարար չէ ներկա մարտահրավերներին դիմակայելու տեսանկյունից, և շատ շուտով քաղաքացիական հանրությունը կինքնակազմակերպվի ու կկարողանա մեկ պլատֆորմով ներկայացնել իր մտահոգությունները, իր տեսլականները այս բոլոր խնդիրների հաղթահարման ուղղությամբ:
