Ուկրաինայի նախագահի թեկնածու Յուլյա Տիմոշենկոն դիմել է իր հայրենակիցներին, գրում է Cenzor.net-ը:
«Հարգելի՛ հայրենակիցներ
Այսօր մեր հայրենիքի գլխին մահացու վտանգ է կախված: Արտաքին ագրեսիայի պատճառով Ուկրաինան կանգնած է պետական անկախության և ինքնիշխանության կորստի շեմին: Խոսքն արդեն միայն Ուկրաինայի ներքին գործերին խառնվելու մասին չէ, այլ մեր երկիրը բռնազավթելու և գրավելու փորձի: Արևելքում գործում են ոչ թե ուկրաինացի սեպարատիստները, այլ լավ մարզված և զինված ռուս հետախույզները:
Եկեք իրերն անվանենք իրենց անուններով: Ուկրաինային փաստացիորեն պատերազմ է հայտարարված:
Ես մինչև վերջերս վստահ էի, որ ներկայիս ճգնաժամը հնարավոր է կարգավորել խաղաղ ճանապարհով` կանխելով Ռուսաստանի լայնամասշտաբ ագրեսիան ընդդեմ Ուկրաինայի: Այսօր արդեն այդ հնարավորությունները չկան: Նրանք չեն կանգնի, եթե մենք նրանց չկանգնեցնենք:
Այսօր, հնարավոր է, ամենածանր օրն է Ուկրաինայի 23 տարվա անկախության ընթացքում: Սակայն որոշում ընդունելու ժամանակն է: Ագրեսորին հանդարտեցնելու ժամանակն ավարտվել է:
Այդ պատճառով էլ ես` որպես Ուկրաինայի խոշոր քաղաքական կուսակցություններից մեկի առաջնորդ, աջակցում եմ վճռական հակաահաբեկչական գործողության իրականացմանը Ուկրաինայի զինված ուժերի հետ մեկտեղ: Ավելին, ժամանակն է համազգային դիմադրություն կազմակերպելու մասին հայտարարել ռուս ագրեսորին բոլոր թույլատրելի միջոցներով, այդ թվում` ընդհանուր մոբիլիզացում անցկացնելու ճանապարհով:
Մենք պետք է աշխարհին ցույց տանք, որ ունակ ենք ինքնուրույն պաշտպանվելու: Եվ այդ ժամանակ աշխարհը կօգնի մեզ:
Ես բոլոր պետությունների առաջնորդներին կոչ եմ անում, առանց հապաղելու, Ռուսաստանի նկատմամբ կիրառել պատժամիջոցների երրորդ մակարդակը: Համաշխարհային առաջնորդներից ես նաև խնդրում եմ անմիջական ռազմական օգնություն ուկրաինացի ժողովրդին, որը պայքարում է ազատության համար, որը զոհվում է այդ ազատության համար: Ես համաշխարհային առաջնորդներին խնդրում եմ գործել»։
