Ռյազանի մարզի Սարաևսկի շրջանի դատարանը 90-ամյա Նիկոլայ Ռյաբովին դատապարտել է 3,5 տարվա պայմանական ազատազրկման՝ թմրանյութերի ապօրինի ձեռքբերման և պահպանման մեղադրանքով: Քննության վարկածով, նա կանեփը քաղել և չորացրել է՝ հետագայում ձկնորսության ժամանակ օգտագործելու նպատակով: Դատարանի որոշմանը ուշադրություն է դարձրել «Mediazone»-ը:
Ռյաբովը Մոսկվայի գեոդեզիայի և քարտեզագրության պետական համալսարանի պրոֆեսոր է:
Նա բացատրել է, որ մի քանի տասնամյակ առաջ նա կանեփ է տնկել Բոլշիե Մոժարի գյուղում գտնվող իր հողամասում և բույսի սերմերն օգտագործել է ձկնորսության համար: Այդ ժամանակվանից թփերը շարունակում են աճել այնտեղ:
Քննության վարկածով, Ռյաբովը գիտակցել է, որ դա օրենքով արգելված է:
Դատարանում նա իրեն մեղավոր է ճանաչել:
Այս անգամ դատարանը վճիռը կայացրել է հաշվի առնելով նրա տարիքը, առողջական վիճակը, ինչպես նաև համալսարանի նախագահի և ռեկտորի նամակները և Ռուսաստանի բարձրագույն կրթության ոլորտի պատվավոր աշխատողի կարգավիճակը: Դատարանը հաշվի է առել նաև մտադրության շարժառիթը, նպատակը և տեսակը:
Համալսարանի կայքում ասվում է, որ Նիկոլայ Ռյաբովը փիլիսոփայություն է դասավանդում: