Կիևը ՄԱԿ-ին առաջարկել է Ուկրաինայի արևելքում խաղաղարար ուժերի հետ համատեղ օպերացիա իրականացնել, որտեղ մարտի սկզբից դաշնայնացման կողմնակիցների զանգվածային ակցիաներ են անցկացվում՝ հայտնում է gazeta.ru-ն:
Համապատասխան հայտարարությունն արել է Ուկրաինայի նախագահի պաշտոնակատար Ալեքսանդր Տուրչինովը՝ ՄԱԿ-ի գլխավոր քարտուղար Պան Գի Մունի հետ հեռախոսազրույցում:
«Մենք դեմ չենք և ողջունում ենք, եթե ձեր օգնությամբ արևելքում համատեղ հակաահաբեկչական օպերացիա իրականացվի: Այդ դեպքում մասնագետներն ու դիտորդներն իրենք կկարողանան հաստատել մեր գործողությունների լեգիտիմությունն ու օրինականությունը»,- Տուրչինովի խոսքը մեջբերում է «Բատկիվշչինա» կուսակցության մամլո ծառայությունը:
Իր հերթին, գլխավոր քարտուղարն ասել է, որ Կիևը կարող է լիովին հույս դնել ՄԱԿ-ի վրա որպես գործընկերոջ: «Ուզում եմ հայտնել իմ լիարժեք աջակցությունն ինչպես անձամբ Ձեզ, այնպես էլ՝ Ուկրաինայի ժողովրդին: Ես կանեմ ինձնից կախված ամեն բան, որպեսզի իրավիճակը հնարավորինս արագ հարթվի խաղաղ ճանապարհով»,- ասված է ՄԱԿ-ի տարածած հաղորդագրության մեջ:
