Հիվանդությունները սեզոնայնություն ունեն. աշնանը և գարնանը դրանք սրվում են: Սեզոնային սրացումներ են լինում նաև սիրտանոթային հիվանդությունների դեպքում: Ապրիլի 14-ին լրագրողների հետ հանդիպմանը սրտաբան Միքայել Ադամյանը նշեց, որ անհրաժեշտ է բժիշկների ուշադրության ներքո լինել, հետազոտվել գոնե 3-4 ամիսը մեկ, իսկ ախտորոշում ունեցողների դեպքում` ավելի հաճախ:
«Հայաստանի բնակչությունը շատ է կաղում բժշկական կուլտուրայից, պրոբլեմներից փախչել՝ չի նշանակում այն լուծել: Լավագույն բժշկությունը կանխարգելիչն է. կանխարգելելով այն` պրոբլեմը փոքրացնում ենք: Մեծացել է այն հիվանդների թիվը, ովքեր այցելում են կանխարգելիչ նպատակով: Սրտանոթային հիվանդությունների ավելացման պատճառներից են ժառանգական գործոնը, նստակյաց ապրելակերպը, ծխելը ևս մեծ ռիսկային գործոն է, որը, ցավոք, նկատում ենք նաև կանանց մոտ:
Մեծ դեր ունի նաև սնունդը. մեր ազգաբնակչությունը սնվում է` առանց դիետա պահելու: Մեր պապերը մեզնից առողջ են եղել, շատ են շարժվել և օգտագործել տվյալ սեզոնին բնորոշ սնունդ, ոչ թե յուղոտ միս տարվա բոլոր եղանակներին»,- ասաց նա` հավելելով, որ պետք է սահմանափակել յուղոտ սննդի, աղի, շաքարավազի օգտագործումը, այս սեզոնին պետք է կանաչեղեն շատ օգտագործել: Սրտաբանի խոսքով` օրական կատարվում է միջինը սրտի 7 վիրահատություն: Բաց վիրահատությունների արժեքը 2.5-3.5 մլն դրամ է` կախված վիրահատության բարդության աստիճանից, կորոնոգրաֆիան` մոտ 370 հազար, ստենդավորումը` 1 մլն 100 հազարից մինչև 2 մլն 100 հազար դրամ:
Վիրահատությունները, ըստ Ադամյանի, Հայաստանում բավական մատչելի են դրսի համեմատ, իսկ սարքավորումների ոչ մի տարբերություն չկա: Սրտաբանն ուրախալի է համարում, որ մեր երկրում շատերն արդեն երիտասարդ հասակից են զբաղվում իրենց առողջությամբ: Հայ ազգաբնակչության մեջ խառնամուսնությունները քիչ են, հիվանդությունների ավելացումն ու երիտասարդացումը հենց դրանով է պայմանավորված:
Բժիշկների արտահոսք կա Հայաստանից, սակայն Ադամյանը դա սոցիալական վիճակի հետ չի կապում, նշում է` մարդիկ փնտրտուքի մեջ են, սակայն դա անպայման կապել սոցիալական դրության հետ պետք չէ:
Տղամարդկանց դեպքում սրտամկանի ինֆարկտը ավելի հաճախադեպ է, իսկ կանանց դեպքում հաճախադեպ է` հիպերտոնիան: Սրտանոթային հիվանդությունների, ինֆարկտի տարիքը երիտասարդացել է, ռիսկային խումբ են տղամարդիկ` 40-ից հետո, կանայք` 50-ից հետո:
