Ավան և Նոր Նորք վարչական շրջանների ընդհանուր իրավասության դատարանում Արմեն Վարդապետյանի նախագահությամբ շարունակվեց Վոլոդյա Նիկոյանի գործի դատական քննությունը:
84-ամյա ծերունին մեղադրվում է որդուն դիտավորյալ սպանելու համար՝ ՀՀ քրեական օրենսգրքի 104 հոդվածի 1-ին մասով: Սակայն ըստ ծերունու վարկածի՝ որդուն սպանելու դիտավորություն ինքը չի ունեցել:
2013 թվականի հունվարի 11-ին, ժամը 16-ն անց 30-ի սահմաններում Նոր Նորքի 2-րդ զանգվածում գտնվող բնակարանի իր ննջասենյակում Վոլոդյա Նիկոյանը անսթափ վիճակում գտնվող որդու կողմից հայհոյելու, իրեն վիրավորելու, բռունցքով գլխին հարվածելու պատճառով իր ձեռքի դանակով մեկ անգամ հարվածել է որդու կրծքավանդակի ձախ կեսի սրտապտկային հատվածին և սպանել է նրան:
Այսօր մեղադրողի միջնորդությամբ դատարան էր ներկայացել դատահոգեբանական փորձաքննությունն անցկացրած փորձագետ Էլդա Գրինը:
Փորձագետը պնդեց իր տված եզրակացությունը, որ հանցագործության կատարման պահին Վոլոդյա Նիկոյանը գտնվել է սթրեսային վիճակում: Նրա մոտ ֆիզիոլոգիական աֆեկտի առկայություն ինքը չի գտել, քանի որ բացակայել է աֆեկտի համար անհրաժեշտ երրորդ փուլը. հանցագործությունից հետո 84-ամյա ծերունին ուժասպառ չի եղել կամ փորձագետի հետ զրույցում չի կարողացել ճիշտ ներկայացնել հնարավոր ուժասպառությունը:
Փորձագետը մի քանի անգամ կրկնեց, որ դատարանը կարող է գործի տվյալները, ամբաստանյալի՝ իր որդու կողմից շարունակաբար նվաստացումների ենթարկվելու, սթրեսային հոգեվիճակի կուտակումների հանգամանքները, ամբաստանյալի տարիքը հաշվի առնել ու նրա արարքի իրավաբանական գնահատականը տալ՝ որպես հոգեկան խիստ հուզմունքի վիճակում կատարված սպանություն:
Էլդա Գրինը խոստովանեց, որ ամբաստանյալ Վոլոդյա Նիկոյանին լավ է հիշում, դրական է գնահատել նրա մի շարք հատկանիշները՝ աշխատասիրությունը, հետաքրքրասիրությունը, ազնվությունը:
«Ես համակրեցի այդ տարեց մարդուն»,- ասաց դատական հոգեբանը:
Նիստի ավարտից հետո 84-ամյա ամբաստանյալ Վոլոդյա Նիկոյանը խոնարհվեց ու համբուրեց հավերժ Գրինի ձեռքը:
Նիստը հետաձգվեց՝ դատաբժշկական փորձագետի չներկայանալու պատճառով:
Այսօրվա նիստին չէր ներկայացել նաև ամբաստանյալի թոռը, որ միևնույն ժամանակ նաև տուժողի իրավահաջորդն է՝ սպանվածի որդին:
