ՊԵԿ-ը հրապարակել է 2019 թվականի հունվար-սեպտեմբեր ամիսների դրությամբ 1000 խոշոր հարկատուների ցուցակը։
2019 թվականի 2-րդ եռամսյակի համեմատ առաջին հնգյակում փոփոխություններ չկան։ Սա կառուցվածքային առումով ի՞նչ է նշանակում․ որակական փոփոխություններ փաստացի չունենք խաղի կանոնների անփոփոխ մնալու հետևանքո՞վ, թե՞ ․․․ «Առաջին լրատվական»-ի հարցին «Տնտեսական իրավունքի կենտրոն» ՀԿ նախագահ Մովսես Արիստակեսյանը պատասխանեց․ «Դուք համեմատությունը բերեցիք առաջին հնգյակի հետ այս տարի, բայց անցած տարի չորրորդ տեղում «Ալեքս Հոլդինգն» էր, որը հիմա ընդհանրապես չկա։ Այն այժմ ենթարկվել է կառուցվածքային փոփոխությունների, ինչը յուրահատուկ է այդ ընկերության սեփականատիրոջը։ Տարիներ շարունակ նա իր բիզնեսը ենթարկել է բաժանումների հարկային պարտավորություններից խուսափելու համար։ Իսկ այսօր ինչ է տեղի ունեցել իրականում, ես դեռ չեմ ուսումնասիրել և չեմ կարող վերլուծել։ Այդուհանդերձ, այսօր նրա ընկերություններից «Երևան Սիթին» զբաղեցնում է 19-րդ տեղը։ Այսօր քաղաքական հայտարարություն է արվում, որ մենաշնորհները վերացել են, բայց «Երևան Սիթին» նախկին մենաշնորհային ենթակառուցվածք է, որը պահպանվել է ամբողջությամբ և նորից ճնշում է փոքր բիզնեսին։ Այսօր ո՞ր մենաշնորհատերն է իր տեղը զիջել, որպեսզի փոքր բիզնեսը զարգանա»։
Իսկ ԱԺ «Իմ քայլը» խմբակցության պատգամավոր Եղիշե Սողոմոնյանն էլ ասաց․ «Ես համաձայն չեմ պարոն Արիստակեսյանի տեսակետին։ Ճիշտ է, մենաշնորհների տեսակարար կշիռը դեռ մեծ տոկոս է կազմում, բայց դինամիկայի մեջ տեսնում ենք, որ այդ տեսակարար կշիռը 2018 թվականից հետո գնալով նվազել է նույն շաքարի ոլորտում, բանանի ոլորտում, դիզելային վառելիքի, բենզինի ոլորտներում։ Այսինքն՝ թվերը կան, հրապարակվում են, և մենք տեսնում ենք այդ փոփոխությունը»։
Մանրամասները՝ տեսանյութում։
