Միացյալ Նահանգների Կոնգրեսի ներկայացուցիչների պալատը ձայների բացարձակ մեծամասնությամբ՝ 405 կողմ, 11 դեմ, 3 ձեռնպահ հարաբերակցությամբ, ընդունել է Հայոց ցեղասպանությունը ճանաչող բանաձևը: Սա իսկապես պատմական քայլ էր ԱՄՆ ներկայացուցիչների պալատի կողմից, ինչը բնականաբար դեռ չի նշանակում բանաձևի վերջնական ընդունում:
Այս առնչությամբ միջազգայնագետ Սուրեն Սարգսյանը «Առաջին լրատվական»-ի հետ զրույցում ասաց. «Հայկական լոբբիստական կառույցներն ու հայ համայնքը այս անգամ որոշել են մի փոքր այլ ճանապարհով գնալ: Սա օրենքի նախագիծ չէ, որ ներկայացված է ԱՄՆ Կոնգրեսի հաստատմանը, այլ հայտարարություն է՝ ներկայացված Կոնգրեսի երկու պալատներում. Ներկայացուցիչների պալատն այն արդեն ընդունել է, իսկ Սենատում դեռ պետք է քվեարկվի: Եվ քանի որ սա օրենք չէ, որևէ կարիք չկա, որ վավերացվի նախագահի կողմից կամ վետո կիրառվի նրա կողմից»:
Մեր զրուցակցի խոսքով՝ սա, իհարկե, կարևոր քայլ է, և մեր հայրենակիցների համար սկզբունքային նշանակության հարց է եղել:
Սուրեն Սարգսյանի կարծիքով՝ այս բանաձևի ընդունումը կապ չունի Հայաստանի հետ, որովհետև նախաձեռնողները հայ համայնքն ու հայկական համայնքային կազմակերպություններն էին, մասնավորապես՝ Ամերիկայի հայկական համագումարը և Հայ Դատի գրասենյակը. «Հայաստանն այստեղ որևէ բան չէր էլ կարող անել: Ամեն ինչ այստեղ տեղի է ունեցել բացառապես լոբբիստների և մեր համայնքի աշխատանքի, ինչու ոչ՝ նաև ճնշման արդյունքում: Ես կարծում եմ՝ ամենակարևոր ճնշումներից մեկը քվեարկությունից ժամեր առաջ Քիմ Քարդաշյանի գրառումն էր, որի արդյունքում, կարծում եմ, տասնյակ հազարավոր զանգեր գնացին Կոնգրես, և կոնգրեսականներից ընտրողները պահանջեցին ճանաչել Հայոց ցեղասպանությունը»:
Հարցազրույցն ամբողջությամբ՝ տեսանյութում:
